„Разголени фотки, говор на омраза“ и уште 3 типови објави на социјалните мрежи што може да ви ја уништат кариерата

Дали пред да споделите коментар, фотографија или пак некое меме на социјалните мрежи размислувате како тоа може да се одрази врз вашата кариера? Експерт за кариера споделува кои типови објави светските компании ги сметаат за проблематични и на кои треба да внимавате, затоа што пред да ве вработат задолжително ќе ве проверат на социјалните мрежи.

Голем број од младите луѓе кај нас, освен што сакаат да работат за домашните, бараат вработување и во странските компании, а се разочаруваат кога ќе добијат негативен одговор.

Можеби проблемот не е во способноста и знаењето, туку во типовите објави што ги споделувате на социјалните мрежи, а не сте свесни за тоа.

Роз Шелдон е експерт за менаџирање на бизнис репутација во Англија, а говорејќи за Daily Mail, таа откри кои типови на објави на социјалните мрежи сериозно може да ви наштетат на кариерата.

Според неа, компаниите честопати ги проверуваат профилите на социјалните мрежи на кандидатите за вработување и врз основа на нив може да проценат кои од нив би можеле да бидат проблематични, а во носењето одлука голема улога играат претходните објави на кандидатот на социјалните медиуми и неговите коментари.

Според неа постојат неколку типови на коментари и објави на социјалните мрежи од кои би требало да се воздржите затоа што тие би можеле да ви наштетат врз кариерата и дури да ви направат проблеми.

Какви фотографии, коментари и објави не би требало да има на вашите профили?

Објави поврзани со забави каде сте биле под дејство на алкохол и опојни супстанци (или во премногу смели изданија)

Голем број од комапниите денес наоѓаат работници со помош на интернет. Очекувајте дека одговорните задолжително ќе ги погледнат вашите профили на LinkedIn, Инстаграм, Фејсбук, ТикТок и Твитер пред да ве вработат.

Најчесто на овој начин тие се обидуваат да откријат каква личност сте, а објавите што укажуваат на тоа дека сте проблематична личност, како фотографиите на кои сте под дејство на алкохол или опојни супстанци или фотографиите во смели изданија може да ви направат проблем.

Освен што тешко ќе најдете вработување, може да се соочите со проблеми и кај моменталниот работодавец, кој смета дека треба да го заштити угледот на сопствената компанија.

Внимавајте што зборувате и објавувате за работодавците (или шефот)

ТикТок, Инстаграм, Фејсбук... Ова се само некои од социјалните мрежи каде често се случува луѓето да објават видео или фотографии и да покажат што се случува на нивното работно место кога никој од клиентите не гледа, а потоа истите луѓе се жалат како добиле отказ.

Обидете се на интернет да се воздржите од објавување содржини со кои ќе ги навредите работодавците, менаџерот или воопшто компанијата.

Не заборавајте, содржините што ги објавувате нема да влијаат само врз моменталното вработување, туку и врз идните – затоа што никој не сака да вработи потенцијален „свиркач“ што е подготвен да открива тајни во јавноста кога не е задоволен од начинот на работа или од платата што ја добива.

Навредливи и вулгарни коментари за славните и вклучување во бурни дискусии за актуелни теми

Бурните дискусии за одредени актуелни теми зачувајте ги за оние вечери кога сте излезени со пријателите или блиските, а воздржете се јавно да коментирате или да критикувате на актуелни теми на социјалните мрежи (затоа што никој не сака да биде поврзан со вашиот говор на омраза, па заради тоа да биде претставен во лошо светло).

Точно е дека вие можете да правите што сакате во вашето слободно време, но навредливите коментари на интернет, говорот на омраза и контроверзните ставови може да ве доведат во непријатна ситуација со претпоставените и нема да имате оправдување за сопственото однесување.

Јавни навреди кон луѓето што ве нервираат

Јавните навреди кон луѓето што ве нервираат, кон оние што напишале одредени текстови што ве вознемириле, како и кон однесувањето на некои славни личности може лесно да ве прикаже како насилник, кој нема проблем и чувства дека ги вознемирува другите луѓе со сопствените коментари.

Дури и кога сметате дека сте во право, таквите коментари (искажани во момент на нервоза) може да ве означат како насилник, а заради тоа компаниите да не сакаат веднаш да ве примат на работа.

Впрочем, ако така се однесувате на интернет кон луѓе што воопшто не ги познавате како би се однесувале кон соработниците и колегите кога ќе ве изнервираат и „ќе ве извадат од такт“.

Не правите поделба на содржините што ги објавувате на социјалните мрежи

Во ред е на Инстаграм или на Фејсбук да објавувате забавни фотографии или видеа, но нема потреба тоа да го правите и на LinkedIn.

Кога компаниите ќе го погледнат вашиот LinkedIn профил нема потреба да ги следат вашите објави поврзани со здравствените проблеми, коментарите за одредени актуелни случувања или пак вашите „приватни“ фотографии.

Тоа е местото каде најверојатно ќе сакаат да дознаат повеќе за вашите вештини и искуство и нема потреба да го преоптоварувате тој профил со непотребни информации.

Б. С. Б. | Црнобело