Мажи - ни со нив, ни без нив

Најпрво, морам да признаам дека сум среќничка што во животот ја имам А. , другарка која секоја може да ја посака, но не и секој да ја има за другарка. Знае да ги процени луѓето од прва и она што го мисли ќе ти го плесни в лице, што и да е! Баш таа другарка неколку пати ми има кажано: „Ех, мажи, нит‘ со нив, нит‘ без нив!“

Поголема вистина од ова, амин! Колку повеќе нè нервираат толку повеќе ги сакаме. Колку повеќе се инаетиме со нив, толку пострастен ни е сексот.  Има моменти кога очи не сакаш да им видиш, за веќе наредниот да ни недостигаат. И сево ова не е дека ние жените драматизираме или сме во ПМС, ниту дека мажите не сакаат да се врзат или се алергични на женски солзи, туку само поради тоа што човекот е единственото живо суштество кое обожава наједноставните работи да ги направи најкомплицирани.

Тоа ти е како да имаш јаже и одеднаш (најчесто од досада, невозбудливост) правиш јазли, па се обидуваш да ги отплеткаш со свежо налакирани нокти. А, некаде длабоко во нас, знаеме дека чудно и бескрајно магично сме си потребни еден на друг.

Верувам дека нема повозвишена работа од тоа маж да напише поезија за единствената жена која ги знае сите тајни влезови на неговото срце. На другиот тас, жените. Психолози, новинарки, уметници, колумнистки, активистки, актерки пишуваат, ги возвишуваат или понижуваат мажите. Пишуваат, коментираат, анализираат, споредуваат.

Одеднаш, сите врски на светот може да ти заличат на спортски натпрвар или маратон.

Па, нека е маратон! Не мислам на оној меѓу чаршафите, туку оној низ животот. Ете, би трчала со човекот без кој (не) можам. Оној што ќе успее да ме извади од такт за неколку секунди и за половина од тие неколку секунди да ме смири со прегратка. Оној кој никогаш нема да измие садови после ручек, ама ќе прави ручек за викендите.

Штосот е во тоа да најдете човек со кој ќе правите се што се правеле досега, некого од кого нема да бидите зависни, некој што ќе ја обожава вашата комплетност. Убавината не е во тоа да не можете без маж, туку во тоа да можете сè за што сте сонувале, додека Тој ве држи за рака и мисли дека Вие сте најхрабрата и единствената.

Убавината е во тоа да сте свесни дека знаете како низ животот без маж, но прекрасно е ако е со Вас.

Магијата од друго човечко суштество во Вашиот живот е тоа дека насмевката која веќе сте ја имале ќе стане поголема.

Автор: М.К. | Црнобело