Златко Јовановски со впечатлива креација за Талија од „Росалинда“: Фустан со пердуви и бисери за Латино наградите

„Моите креации се екстремно тешки, големи и волуменозни, а на ѕвездите кои ги носат им треба помош при движење“, вели нашиот дизајнер Златко Јовановски, кој третпат креираше фустан за мексиканската ѕвезда која ја глумеше Росалинда.

Нашиот дизајнер Златко Јовановски, познат како ЈЗЈ, ја облече мексиканската ѕвезда Талија за доделувањето на Американските латино музички награди (Latin American Music Awards) кои се одржаа во Лас Вегас.

Таа носеше негов фустан во боја на кожа со многу пердуви, бисери и светкави камчиња, кои се рачно ставени на прекрасната креација.

Талија, која се прослави со улогата на Росалинда, беше една од водителките на престижната манифестација, се преоблече неколкупати, а вечерта ја заврши токму во креацијата на ЈЗЈ.

„Ова е наша трета соработка со Талија. Фустанот е од постоечка колекција, многу ѝ се допаднал, па направивме фустан по нејзини мерки и го испративме во Америка“, рече Златко за CRNOBELO.com.

Тој претходно објави видео на Инстаграм Стори каде се гледа како Талија седи на столче со тркала, додека маж ја турка за да ја однесе зад сцената, пред таа да излезе на бината во креацијата од Златко.

„Моите креации се екстремно тешки, големи и волуменозни, а на ѕвездите кои ги носат им треба помош при движење“, напиша креаторот.

Ова е трета соработка на Златко со Талија. Тој најпрво за неа креираше корсет во розова боја, инспириран од креација што таа ја носела во 1992 година, а потоа направи и златен корсет инспириран од Мадона, а кој Талија го носеше на концерт на поп кралицата.

Повеќе фотографии и видеа од фустанот на Талија:

А. Ј. | Црнобело