Како да носите реси ова лето (а да не изгледате како во 2016-та)?

Едноделните костими за капење со реси на горниот дел се огромен хит, исто како и балетанките и мокасините со реси кои не се многу нападни.

Пред околу една деценија, ресите беа најголемиот моден тренд.

Маички, чанти, чизмички, елеци со реси – сигурно сте имале барем едно вакво парче ако сте ги следеле трендовите.

Сега ресите повторно се враќаат на модната сцена, но во малку помодерна варијанта.

И, не мора да се облекувате во бохо стил за да ги вметнете во секојдневните комбинации.

Како да носите реси ова лето, а да не изгледате демоде?

Реси на костими за капење

Ако не ви се ризикува, а сепак сакате да му дадете шанса на трендот, тогаш најбезбедно ви е да пробате со костим за капење со реси.

Сезонава хит се едноделните костими за капење со реси на горниот дел. За посмел изглед, мошне добро изгледаат и костимите со многу долги реси.

Можете да го комплетирате аутфитот за на плажа со широка наметка и минималистички сандали. Избегнувајте впечатливи додатоци бидејќи самите реси се акцент на целиот изглед.

Чанти со реси

За разлика од порано кога беа хит торбите со реси, сега попопуларни се структурираните чанти со реси.

Ваквите модели може да се комбинираат и со поелегантни парчиња, како костими и фустани.

Притоа, некои модели може да изгледаат добро и со деловни комбинации.

Накит со реси

Обетките и ланчињата со реси одлично ги надополнуваат минималистичките комбинации.

Но, важно е ресите да не бидат од ткаенина или кончиња бидејќи изгледаат малку застарено.

Наместо тоа, носете модели чии реси се направени од истиот метал како накитот.

Фустани и здолништа со реси

Ресите изгледаат можеби најдобро на фустан или здолниште, особено за вечерни излегувања, кога планирате да танцувате.

За разлика од претходно, сега ресите е најдобро да бидат на долниот раб на здолништето или фустанот.

Ако сакате нешто посуптилно, тогаш исто добро изгледаат и реси на долниот раб на ракавите.

Чевли со реси

Чизмичките со реси, и тоа неколку редови, дефинитивно се демоде.

Но, суптилните реси на балетанки, влечки и мокасини изгледаат навистина добро и може да се комбинираат со поелегантни парчиња.

Спирова С. | Црнобело