Совети за дневна шминка

Иако некои велат дека шминката на дневна база е штетна за кожата, сепак нема девојка која би се откажала од својата дневна рутина за шминкање.

 

Денес постојат безброј производи и не секогаш марката е гаранција за квалитет. Ако ефтината пудра прави чуда на вашето лице, тогаш слободно користете ја.

Жените се зависни од дневнaтa шминка. Причина за тоа е што со неа се чувствуваат убаво, им ја зголемува самодовербата додека се соочуваат со работните предизвици, кога треба да се појават на кафе со пријателките или да одат во шопинг.

Најважното правило што треба да го имате на ум додека ја нанесувате дневната шминка е дека не смеете да претерувате. Шминката треба да биде лесна, да ги истакнува цртите, а сепак да влијае природно. Само така ќе добиете нежен и женствен изглед совршен за на дневна светлина.

1. Пудра.
Не користете тешка пудра. Камените и оние во прав оставете ги за навечер. За преку ден најдобро е да нанесувате лесна течна пудра. Но, внимавајте да не изберете премногу темна нијанса. Денес има супер замена и за пудрите. Станува збор за крем со УВ-заштитен фактор кој го изедначува тенот, дава природен сјај и подлоготрајна шминка.

2. Моливче.
Најчесто не се препорачува исцртување на очите преку ден, но ако не сте задоволни од формата на вашето око, не избегнувајте го. Сепак, линијата на капакот нека биде потенка и дискретна, а долу исцртајте го само крајот од окото. Покрај црното, употребувајте сиво или зелено моливче.

3. Сенки.
За преку ден се препорачуваат светли тонови. Користете пастелни бои, како на пример беж, сина, виолетова, кафена и темнозелена. Нанесете ја на целиот капак и задолжително одоздола. Ако, сепак, мислите дека тоа е премногу светло за вас, крајот на окото засенете го со потемна нијанса.

4. Маскара.
За дневната шминка пресудна улога игра маскарата. Дозволено ви е да нанесете големо количество. Колку поинтензивни трепки, толку подобро. Можете да поминете и без сенка. Истакнати трепки, малку руменило, сјај за усни и добивате совршен изглед.

5. Руменило.
Не смеете да ставате премногу од руменилото преку ден. Еден блед слој е доволно. За преку ден најмногу се препорачува розево или една нијанса потемно од природниот тен.

6. Сјај.
Сјајот е одличен пронајдок за дневна шминка. Се прифаќа безбоен, со боја на праска или розов.  Можете да поминете и само со „лабело", но дозволен е и поинтензивен кармин доколку очите се благо истакнати.