3 модни парчиња кои треба да ги имате за меѓусезона лето/есен

Преминувањето од лето во есен само по себе е тешко, а времето уште повеќе ни го отежнува целиот процес.

Со промената на времето, ладните утра и топли дневни температури, изборот на облека е вистински предизвик.

Секако уште ни е рано да се разделиме од летните фустанчиња, здолништа и сандали, но излозите веќе се полнат со мантили и кратки чизмички.

А, со добра комбинација, ќе успеете да ги носите сите овие парчиња заедно.

За меѓусезона, неопходни ви се овие 3 модни парчиња, а на вас останува правилно да ги искомбинирате:

Мантил

Овој моден класик е секогаш добра инвестиција, бидејќи можете да го носите буквално додека не го уништите. Покрај тоа, одлично може да се комбинира и со есенска и летна облека.

Во потоплите денови облечете го врз краток фустан или шорцеви и додадете малку накит, а во есен врзете марама околу врат и облечете џемперџе или кошула.

Кратки чизми

Сигурно имате барем еден пар кратки чизми во гардероберот, бидејќи веќе неколку години по ред тие не излегуваат од мода. Доколку немате, погрижете се да ги имате во овој период на променливо и дождливо време, а комбинирајте го со летен фустан, здолниште или шорцеви.

Кожно здолниште

Кожата обично асоцира на поладни месеци, но во комбинација со обична маица по кратки ракави и малку накит, кожното мини здолниште може да биде идеално парче за крајот на летото.

А, кога ќе дојдат поладните денови, маицата заменете ја со потенко џемперче или блуза, сандалите со чизми и подготвени сте за новата сезона.

М. М. | Црнобело