Модна дилема: Кое е прашањето што жените најчесто го пребаруваат на Pinterest?

Никогаш не би погодиле кој е одговорот по кого трагаат мнозинството кориснички на популарната социјална мрежа. Нам ни е изненадување, а веројатно ќе биде и за поголемиот дел од вас.

Платформата Pinterest е непресушен извор за инспирација на буквално секоја тема – од мода и убавина, преку уредување на домот, па сѐ до патувања и мотивациски мисли.

Од социјалната мрежа први ги дознаваме сите новини и најпопуларните трендови во моментот, а сега откривме и кое е модното прашање што е најпопуларно помеѓу тренди девојките ширум светот.

И, мора да признаеме дека сме поприлично изненадени. Се работи за прашањето „Како да носите хеланки?“, односно со што може да се искомбинира ова парче облека, кое досега беше главно резервирано за манекенките, но и обичните „смртнички“ кои имаат тело за истите.

Станува збор за мошне неблагодарен дел од женската гардероба, бидејќи ги истакнува сите физички атрибути, но и мани на фигурата, па хеланките се моден избор само на најхрабрите жени.

Притоа, спаѓаат во категоријата на спортска елеганција која не е јасно одредена, па не зачудува што девојките ги интересира како правилно да ги носат.

Манекенките, како Бела и Џиџи Хадид, обожуваат да ги носат „crop top“ маички, обични маици, но и бомбер јакни и дуксери со качулка, па бидете сигурни дека со нив нема никогаш да погрешите.

Кендал Џенер, пак, често ги комбинира и со кожна јакна или палто.

Второто прашање кое најмногу ги интересира корисничките на социјалната мрежа е како да ги носат фармерките со „машки“ крој, а кога е убавината прашање, припадничките на понежниот пол и понатаму најповеќе ги занимаат тајните на контурирањето, иако тоа и официјално излезе од мода.

Која е вашата aктуелна модна дилема на Pinterest?

М. А. | Црнобело