5 парчиња облека за кои веќе нема простор во вашиот плакар

Ако вашиот плакар е преполн со облека, а сепак немате што да облечете, тоа е сигурен знак дека дошло време за голема генералка. Направете селекција и исфрлете ги сите оние парчиња облека на кои не им е местото на вашите полици и закачалки, без да имате нималку грижа на совеста.

Ако уште не сте сигурни од што сè треба да се ослободите, ние ќе ви помогнеме со следниве совети:

Неудобни обувки

Можеби некогаш не ви пречеле тесните и неудобни обувки на висока потпетица, но кога ќе ја надминете таа фаза, ќе сфатите дека само непотребно сте си ги мачеле нозете. Одберете удобност, пред сè друго и инвестирајте во квалитетни обувки, бидејќи тоа е поважно отколку тоа да имате што поголем број различни чевли со штикла.

Претерано искинати фармерки

Кај фармерките е најважно да го најдете кројот кој одговара на вашата силуета. Ако сепак сакате искинати фармерки, изберете такви со подискретни дупки и носете ги во пригоди кои тоа го дозволуваат.

Прекуси здолништа

Мини-здолништата не се облека за зрели и сериозни девојки и жени, па затоа треба да заборавите на нив веќе веднаш по студентските денови. Со сериозноста во вашиот карактер, треба да дојде сериозноста и во стилот на облекување. Изберете елегантни здолништа со должина до колениците.

Патики со платформа

Овој тип на обувки секоја сезона се враќа во различни облици, но обидете се да ги замените со класични бели патики, кои ви дозволуваат да експериментирате со повеќе комбинации.

Неугледна облека за по дома

Ова не значи дека треба да се дотерувате за по дома, но не дозволувајте да носите нешто што повеќе личи на крпа за бришење на подови, отколку на облека. Всушност, кога сте сами дома, можете да бидете облечени баш онака како што ви е најудобно, но доколку ви се најават гости или ако треба да излезете на состанок на куќен совет или до продавница, обидете се да бидете пристојно облечени.

Е. Д. | Црнобело