Популарни модни парчиња кои нема логика да ги носите

Ви се допаѓале вам или не, одредени трендови се во суштина бесмислени и бескорисни. А, сепак на големо се продаваат и купуваат. 

Постојат трендови кои ни се допаѓаат. Постојат трендови кои не ни се допаѓаат. А, постојат и трендови кои немаат баш никаква смисла, па чија поента на постоење не ја разбираме. Дел од нив се моментално хитови во модната индустрија.

Има девојки што ги обожаваат, додека останатите секојпат се прашуваат – зошто? И навистина е нејасно. 

Ова се популарните модни парчиња кои нема логика да ги носите:

Проѕирен ранец

Која е функцијата на било каква торба изработена од транспарентен материјал? Сезонава се во тренд проѕирните ранци, кои во својата есенска колекција ги понуди и познатиот шпански бренд Zara. Меѓутоа, зошто би откриле на цел град што се крие во внатрешноста на вашата чанта? Освен магнет за крадци, функционалноста на моделите од пластика е еднаква на нула.

Отворени чизми

На нозете имате чизми, а прстите ви ѕиркаат низ отвори. Зошто?! Ако веќе носите такви обувки, веројатно се подразбира дека сме навлезени во студената сезона, па нема причина од нив да правиме сандали. А, за неверување е колку ваквите модели се всушност популарни.

Монтка елек

Исто како и за чизмите со отворени прсти, не ни е јасна (не)функционалноста на ова модно парче. Технички, носите зимска јакна, ама без ракави. Да бидеме реални – можете и без монтка елекот, зар не?

Ролка без ракави

Уште една парадоксалност налик на елекот од погоре. Ролката е едно од најтоплите парчиња облека, но во оваа варијанта таа нема ракави. Можеби естетски изгледа добро и фенси. Меѓутоа, повеќе нé интересира каде и кога ќе го носите ваквиот модел?

Пластични чизми

Ова се омилените чевли на сестрите од семејството Кардашијан. Едно време ги носеа константно. Од балканската сцена, пак, по нив лудува поп-фолк дивата Јелена Карлеуша. Но, сеедно се бесмислени. По само петнаесетина минути, во овие чизми веќе е насобрана кондензирана вода, по што се замаглува пластиката. А, замислeте си колку ли се неудобни после неколку часа?

Распарчени фармерки

Не, ова не се скинатите фармерки со процепи на одредени места. Ова се фармерките кои се буквално распарчени, како да сте ги искасапиле со ножица. Покрај тоа што немаат смисла, делуваат и мошне невкусно.

М. А. | Црнобело