Зошто морнарскиот дезен никогаш нема да излезе од мода?

Се работи за безвременски летен тренд што секогаш изгледа свежо и неодоливо. Затоа ригестиот дезен е сè уште голема инспирација за модните креатори, исто како што беше и порано. Се работи за иконски стил што никој не остава рамнодушен.

Но, што е тоа што го прави ова едноставно парче, како маица со сини и бели ленти, толку неодоливо со децении?

Оваа култна облека била најпопуларна во 1950-тите, во голема мера благодарение на многуте познати личности кои го прифатиле овој тренд. Актери, уметници, музичари, модели, интелектуалци, па дури и велосипедисти – сите сакале да носат морнарски маици.

Брижит Бардо и Пабло Пикасо носеле ригести маици како свој заштитен знак. Морнарскиот стил го сакале Џејмс Дин и Одри Хепберн.

Популарноста на морнарскиот стил не е намалена, бидејќи многу славни дами, како Кејт Мос, Алекса Чанг, Оливија Палермо и Софија Копола сè уште уживаат во овој стил.

Модниот дизајнер, Жан Пол Готје честопати носи маички со морнарски принт, кој, исто така, се провлекува низ неговите колекции.

Од каде потекнува овој моден стил?

Според бројни извори, бретонската маица е создадена како одговор на официјалниот чин на француската влада на 27 мај 1858 година. Така, сега веќе познатата сино-бела ригеста кошула, станала официјална униформа на морнарицата во Бретања.

Оригиналниот дизајн содржел 21 лента, по една за секоја победа на Наполеон. Се верувало дека наизменичните светли и темни ленти ќе ги направат морнарите полесно видливи во брановите.

Во светот на модата овој принт го вовела познатата Коко Шанел, инспирирана од француската ривиера.

Ова бил пример во кој Коко инспирацијата ја пронашла во машката облека, за од неа да создаде елегантна и удобна женска облека.

Останатото е историја…

Ашера | Црнобело