Работи со кои туристите во Италија ги иритираат локалците, според Италијанка

Изнајмуваат превозни средства кои не можат да ги возат – како електрични тротинети – и ја загрозуваат својата, но и безбедноста на другите возачи и пешаци.

Италија е една од најпопуларните туристички дестинации, па локалците навистина се имаат соочено со секакви туристи.

Додека повеќето се културни и покажуваат почит, постојат грешки што ги повторуваат многумина.

Федерика Боко живее во Рим и вели дека постојат многу работи што ги прават туристите, а неа и другите локалци ги иритираат.

Кои грешки треба да ги избегнувате според неа?

Забораваат на сите бон-тон правила за на маса

Италијанците се особено горди на својата кујна и лесно можете да ги навредите ако не сте внимателни.

Федерика советува да не ставате сол во јадењето што ќе ви го послужат пред да го пробате бидејќи со ова ќе го навредите готвачот.

Исто така, избегнувајте да ги сечете шпагетите, а не е препорачливо ни да користите лажица кога ги јадете.

Генерално, кога сте на гости или во локален ресторан, покажете почит кон кујната и готвачот.

Изнајмуваат превозни средства што не знаат да ги возат

Може да биде опасно да возите низ град што не го познавате, особено со превозно средство што не знаете да го возите.

Најдобар пример за ова се електричните тротинети.

Федерика забележала дека бројни туристи ги изнајмуваат, но не ги возат прописно и со тоа им пречат на другите возачи, но и на пешаците.

Истовремено, многумина ги паркираат несоодветно.

Таа советува и да не изнајмувате скутери освен ако не знаете да ги возите добро. Возењето скутер не е исто како на филмовите бидејќи низ италијанските градови има многу улички со калдрми.

Не го почитуваат опкружувањето, ниту луѓето кои живеат таму

Иако Италија е популарна туристичка дестинација, не треба да заборавите дека овде живеат луѓе, дури и на најпознатите атракции.

Па, покажете им почит со тоа што нема да фрлате отпад каде било, нема да правите врева дозна навечер и слично.

Исто така, Федерика истакнува да покажете почит кон историските споменици и места и да не ги уништувате или да се потпишувате на нив.

Не се трудат околу јазикот

Секако, Италијанците не очекуваат да научите италијански пред да ја посетите земјата.

Но, Федерика советува дека ако сакате да користите некои основни зборови, потрудете се да ги изговорите правилно.

Таа забележала дека туристите најчесто го користат зборот grazie (фала) и скоро секогаш го изговараат погрешно.

За правилен изговор секогаш можете да погледнете некое видео на Јутјуб.

Бараат несоодветни оброци во локални ресторани

Ако одите во италијански ресторан, не можете да очекувате да ви послужат јадење од друга кујна. Па, престанете да барате.

Ако ви се јаде нешто друго, секогаш можете да одите во ресторан кој служи друга храна.

Спирова С. | Црнобело