Од Данска до Обединетите Арапски Емирати - извидничките искуства на Димитар Чакар

Иако, многумина не се запознаени, но извидници во Македонија постојат со децении и децении наназад. Речиси секој поголем град си имал свој клуб, цврсто втемелен со интересни активности и норми за почитување. 

Димитар Чакар (19) од Скопје, кој учи и работи како графички дизајнер веќе десет години е активен извидник и член на Првиот Скопски Извиднички Одред, или како што самиот вели, тоа е неговото второ семејство.

Преку неформален начин на едуцирање и извиднички методи, тој, заедно со својот тим, се трудат да ги насочат младите кон прав психички и физички развојот, како и нивно активно вклучување во општесвото.

„Организацијата за мене претставува алатка преку која можам на некаков начин да го подобрам светот и навистина ми претставува задоволство кога гледам како млади деца стекнуваат здрави навики и придонесуваат во создавање на подобар свет за сите нас“, раскажува Димитар Чакар, кој до сега има посетено многу тренинзи, размени и извиднички настани и тоа во Велика Британија, Франција, Данска, сите балкански држави како и голем број на македонски градови.

Проектите биле од едукативен и забавен карактер, полни со нови искуства, пријатели, запознавање на туѓи култури и соочување со различни размислувања. Голем дел од патувањата на Димитар биле бесплатни или со рефундирање на парите, што е една од добрите страни на овие извиднички патувања, достапни за луѓе со секава финансиска состојба.   

Пред неколку недели Димитар Чакар беше дел од 8-миот Интернационален Извиднички Собир во Обединетите Арапски Држави во градот Шарџа, кој се одржува на секои две години.

„Навистина имав среќа што бев дел од собирот, потпишан под мотото Sharjah the World Book Capital of the World. Имаше учесници од 84 различни држави, поточно од 5 континенти. Главната тематика на работилниците беа книгите, дискутиравме за третманот на книгата во различни држави и пробавме да најдеме одговор на прашањето дали дигитализација на книгите би помогнало да се зголеми читачката навика“, споделува Димитар.

Повеќето од учесниците биле од Африка, и самиот амбиент на кампот бил исполнет со нивни песни, мотиви и игри. На секоја прошетка или пауза учесниците слушале песни на различен јазик.

„Многу се радувам што почувствував пустина за првпат во животот. Организаторите нè однесоа на многу забавно и адреналинско сафари со џипови, каде пустината ја искусив на најдобар можен начин“, открива македонскиот извидник, кој заедно со останатите учесници се качиле на Бурџ Халифа, највисокиот облакодер.

Додека се возел во лифтот почувствувал како му се затнале ушите од високата надморска височина. Освен тоа посетиле и музеи, уникатна зоолошка градина, астрономски центри, Дубаи Мол, преубави плажи. Собирот бил посетен од шеикот на Шарџа, пред кого Димитар имал можност да сподели збор-два за Македонија.  

Во моментов Димитар заедно со неговиот извиднички одред работат на подобрување на некои работи во општеството и градот Скопје, и организација на нови кампови. Покрај извидништво, дел од неговото време го користи во изучување на графички дизајн, каде на различни проекти има можност да го имплементира знаењето.

Автор: Евгениј Хоуп | Црнобело