„Бев на патување во Анталија – зошто топло ја препорачувам како дестинација за одмор?“

Некои од ресортите ќе ве воодушеват со местоположбата среде зеленило, каде ќе ве буди песната на птиците, други со пространите плажи, а трети со модерниот ентериер и со тоа што за сечиј вкус има по нешто и тоа од Кемер до Лара (Кунду), преку Белек и Сиде, па до Аланија.

Мене ме воодушеви огромната планина која се надвиснуваше над морето во Кемер и му даваше живописен изглед на овој реон, а како што слушнав и го прави најпријатен за престој во летниот период, со малку пониски температури од останатите.

Потоа, следуваа исто така одличните Лара (Кунду) и Белек, каде ресортите имаат дури и голф терени или сопствени тениски игралишта, модерниот град Анталија, па совршениот стар град во Сиде, каде нема да можете да се наситите од магијата на легендите кои ќе ги слушнете на калдрмата чекорејќи крај морето и на крај од пространите песочни плажи во Аланија, гратче чиј централен дел, преполн шарени тезги со чајчиња, локум и зачини, како и магнети и разни украси ќе ве задржи со часови, жедни да истражувате по неговите улички.

Се разбира, покраината Анталија има и современи трговски центри за оние кои замислуваат поинаков тип на шопинг, а пак речиси секој од ресортите има и диско за забавата да биде комплетна.

Нормално, во нивен склоп има и по низа ресторани, врвни кафулиња, бутици, фризерници и што уште не. Практично личат како мини верзија на гратче.

Но, мора да признаам дека лично мене најмногу ме воодушеви посетата на Аквариумот во Анталија и тематскиот парк „The Land of Legends“.

Во Aквариумот во Анталија се наоѓа најдолгиот тунел на светот од дури 131 метар, каде чекорите додека од сите страни ве опкружува морски свет. Има огромен број на ајкули, па дури и цели потопени автомобили за уникатен изглед на оваа реплика на морско пространство.

Може да храните и ражи со ракчиња, како и со шишенце да храните други видови на риби. Уникатно искуство, дефинитивно!

Од друга страна пак, тематскиот парк „The Land of Legends“ ми донесе друг тип на забава, адреналин и возбуда.

Се возев на најадреналинскиот ролеркостер досега и колку и да ве застрашува ова искуство, топло ви препорачувам да се осмелите. Потоа, тука беше базенот со бранови, па ролеркостер кој завршува во вода, па мрзливата река и што уште не.

Продолжува на следната страна...