„Бев во Охрид, со глисер крстарев по крајбрежјето, јавав коњи, го посетив магичниот манастир Заум – бесценето искуство“

„За мене Охрид носи мирис на детство, има посебен шарм, а сега истражувајќи го неговото крајбрежје со глисер по воден пат сфатив дека навистина имаме непроценливо богатство... Водата на Трпејца, магијата на манастирот Заум, живописноста на јавањето коњи во Љубаништа ме прават горда и сакам на луѓето од целиот свет да им покажам што имаме и да им порачам – Дојдете во Македонија, видете го Охрид! Од параглајдинг до падлборд (веслање на штица), нема да можат да се наситат на забавните активности...“

За Охрид како летна дестинација има поделени мислења, но Охрид за мене секогаш бил и ќе остане незаменлив. Покрај летниот одмор на море, задолжително секоја година минувам една седмица и покрај Охридското Езеро.

Зошто? Затоа што за мене Охрид е мирис на детство, Охрид е калдрмени улички и најромантични ресторанчиња со италијански шмек, Охрид е кристално чиста вода, Охрид е спектакуларна природа и планини надвиснати над езерото, Охрид е место за кое се пишуваат поеми и романи, а во последно време Охрид е и место за незаборавни искуства.

Токму такви имав годинава. Имав можност да го истражувам целото охридско крајбрежје, но овојпат од вода со глисер.

Од утро до зајдисонце со моите пријатели Благој и Кристина и со нивниот син Димитар, кој беше нашиот главен капетан (барем на фотки, се разбира) се возевме и подзастанувавме на најубавите места на македонскиот бисер.

Започнавме од пристаништето во Охрид, па се упативме накај некогашната плажа Потпеш, односно пиевме турско кафе од термос под Црква „Св. Јован Канео“.

Една од најпознатите цркви во Охрид, изгледа маестрално на карпестиот рид во стариот дел на градот гледано од вода.

Потоа следуваше некогашната вила на Јосип Броз Тито „Билјана“, која се смета за една од најтајните вили на некогашниот претседател на СФРЈ.

Па, следеа хотелите со нивните плажи од кои според мој вкус најсредена е „Park Golden Beach“, ако сакате да уживате со коктел во урбана атмосфера.

Но, ако сте за журка со диџеј, младешка енергија, танцување или релаксирање под природна сенка, тогаш ви ја препорачувам плажата „Оревче“, односно Градиште 4.

И дефинитивно најубаво уредување со експлозија од бои и неверојатно зајдисонце има плажата „Jungle Beach“, односно Градиште 3.

Продолжува на следната страна...