„Бев на одмор во Тунис, од Скопје летот е 2.5 часа – зошто оваа дестинација топло ја препорачувам?“

„Јавав камила на зајдисонце во пустината Сахара и возев квад, ѝ давав млеко на бебе камила, галев пустинска лисица, посетив берберско село, воздишки ми измами сино-белиот рај Сиди Боу Саид (буквално туниско Санторини), пливав во претоплата вода на Средоземното Море и му се воодушевував на песокот ситен како брашно, ја почувствував вибрацијата на главниот град и сведочев на маестралноста на некогашната Картагина... Тунис како летна дестинација? Дефинитивно да!“

Минатата година за првпат стапнав на афричкиот континет. Египет дефинитивно ми ги исполни очекувањата, а Црвеното Море кое ми изгледаше како џиновски аквариум со најшарени риби ме воодушеви.

Така, оваа година повторно се одлучив за дестинација Африка. Овојпат Тунис.

Нашите агенции по повеќе од 10 години повторно го ставија на листата на летни дестинации, па со чартер-лет од само 2/2.5 часа од Скопје и комплет организизација ми звучеше примамливо. Аеродромот во Монастир е скромен.

Бев среде август, но климата ме изненади позитивно. Од Египет температурите беа пониски за околу 10 степени во истиот период од годината, постојано имаше пријатно ветерче, а најмногу од сè ми се допадна што навечер заладуваше и можеше да се спие и без клима.

Ресортот и повеќе од убав… Со најситен песок на плажата, палми, огромни базени, забава, активности во текот на целиот ден и што уште не. Омилено ми беше служењето на ручек на плажа со правење скара на самото место за воопшто да не морам да губам време за да одам до главниот ресторан.

Кујната е приспособена на европски стандарди и нема нивни зачини кои не би можеле да ги поднесете, но сепак кога се оди на вака далечна дестинација не е лоша идеја да пиете пробиотик неколку дена пред и за време на одморот.

Има огромен избор на храна, меѓу кои и нивни специјалитети и камилско месо. Кај нив нема диви камили повеќе, туку тие кај нив се одгледуваат како домашни животни, како овците и козите кај нас.

Понудата на ресорти е огромна, но добро прочитајте што нудат, а што очекувате вие и така изберете. Јас секогаш бирам по на страна од големите градови затоа што морето е почисто.

Ние бевме на десетина километри од местото Хамамет, кое е приказна само по себе затоа што ја има најживописната сино-бела Медина каде буквално ќе почувствувате како живеат локалците.

Ќе си купите сувенири, локалците ќе ве опсипуваат со внимание за да извлечат бакшиш од вас, но и ќе ѕирнете во скромните домови на Тунижаните на кои навистина малку им е потребно за среќа.

Таксито е навистина евтино, сувенирите исто така, но како и во Египет и тука има ценкање. Одлично е што законски на продавачите на плажа забрането им е да доаѓаат до лежалките да ве заморуваат и ако нешто ви се допадне, вие ќе станете и ќе појдете до нив додека поминуваат.

Продолжува на следната страна...