„Бев во Валона – што ме воодушеви најмногу?“

Градот Валона е прекрасен и може да ве заведе со својата млада, студентска и динамична атмосфера, но интересот е најпрво за плажите кои се наоѓаат на неколку километри од градот, кои ве уверувам дека се меѓу најубавите во Албанија и навистина нема да се покаете ако отидете на еднодневна екскурзија дотаму за време на вашиот престој во Албанија.

Валона е одлично место за одмор во јуни и јули кога има најмногу туристи и некои од студентите се сè уште таму, но ако барате помирна атмосфера, најдобро е да патувате кон крајот на август или во текот на септември.

Цените се пристапни и верувам дека има добар избор за сите.

Идеи како да се забавувате таму:

Екскурзија со брод (Сазан - Хаџи Али - Карабурун)

Додека шетате низ градот ќе пронајдете неколку опции за екскурзија со брод до островот Сазан и полуостровот Карабурун. Сите компании ја следат истата рута, но помалите бротчиња освен што одат на островот и полуостровот, исто така влегуваат и во пештерата Хаџи Али.

Еден ден пред денот на екскурзијата треба да направите само резервација. Во зависност од тоа која компанија ќе ја одберете, ќе бидете информирани каде е точното место за поаѓање. Овие тури, за жал, сè уште не се погодни за клиенти во инвалидска количка.

Цена: 25 евра (за сите бродови, освен за приватните јахти).

Поаѓање и враќање: Помеѓу 9ч и 18ч во зависност од компанијата.

Рута:

Патување до островот Сазан кое трае околу 1 час.
Поминувате 1 час и 30 минути на островот, а потоа се упатувате кон пештерата Хаџи Али (ако одите со мал брод поминувате 30 минути внатре).
Од таму патувате околу 20 минути до полуостровот Карабурун каде што останувате 3-4 часа и од таму враќање до Валона околу 30 минути.

Островот Сазан

Сазан е, всушност, мал рај на дива и незагадена природа, каде што можете да истражувате патеки кои не се баш лесни, но крајно фасцинантни и мистериозни и се доказ за неговото бурно воено минато.

Островот Сазан никогаш не бил населен, а за првпат бил користен од фашистичкиот режим на Италија во 1930-тите. Бил одбранбено пристаниште за комунистичката влада на Албанија и база за 3.000 војници. Отворен е за туристи од 2015 година.

Овде, кристално чистите води и плажите кои го одземаат здивот се контрапункт на урнатините од Студената војна, од кои дел археолозите откриле и изложиле во Археолошкиот музеј во Драч.

Кога стигнавме на островот бевме само нашата група, па го најдовме најдоброто место на плажата (островот е мал, нешто помалку од 6 квадратни километри). Ако е премногу топло ви препорачувам да носите шешир, бидејќи нема да најдете место за да се скриете под сенка (освен ако не отидете подалеку од плажата), а овде нема лежалки ниту ресторани.

Пештерата Хаџи Али

Пристигнувајќи во пештерата Хаџи Али (позната и како Илирска пештера), можете да нуркате или да останате на бродот. Пештерата го добила името по пиратот Хаџи Али, кој ја користел како засолниште во 16-ти век. За неговата храброст во одбраната на Албанија од инвазиите на британската, турската, неаполската и венецијанската флота, Хаџи Али станал многу познат и почитуван.

Полуостровот Карабурун

Љубителите на природата нема да бидат разочарани. Овде можете да одите на пешачење, планински велосипедизам, спортови на вода, забава со пена. Островот е покриен со шуми од врвот на планините сè до плажите.

Ние бевме на плажата Шен Васили, каде што уживаме во недопрената плажа, неверојатната природа и кристалните води.

Тука ресторанот и лежалките може да чинат повеќе отколку оние покрај градските плажи, но можете да си приготвите храна и да однесете со себе, а ако сакате да заштедите пари на лежалка, ќе најдете и некое дрвце каде што ќе се скриете кога сонцето ќе почне да ви пречи.

©CRNOBELO.com Забрането преземање и копирање. Крадењето на авторски текстови е казниво со закон.

M. Г. | Црнобело