7 совети за ноктите да ви растат побрзо и да бидат здрави

Кокосово масло, сок од лимон, проѕирен лак за зацврстување - како најлесно да ги израснете ноктите, а притоа да бидат убави и здрави?

Ноктите ја обликуваат дланката и ѝ даваат поубав изглед, особено кога се долги и здрави. Па, како да ги зацврстите и да ги израснете побрзо?

Прочитајте ги овие 7 совети кои може да ви помогнат:

Кокосово масло за потхранување

Кокосовото масло ги потхранува ноктите и може да го поттикне нивниот раст.

Истовремено, им обезбедува хидратација на ноктите така што создава заштитен слој кој ја задржува влагата на ноктот.

Експертите препорачуваат да го загреете малку кокосовото масло, а потоа да ги масирате ноктите и врвот на прстите со кружни движења.

Натопете ги ноктите во сок од портокал

Сокот од портокал е одличен извор на витамин Ц и фолна киселина, која ги штити и зајакнува вашите нокти, а им помага и да растат побрзо.

Витаминот Ц помага да се формира колаген, што резултира со поцврсти и поздрави нокти, додека фолната киселина го поттикнува создавањето на клетките и го забрзува процесот на раст на ноктите.

За најдобри ефекти, исцедете го сокот од еден портокал во мал сад. Потопете ги ноктите во сокот 10 минути.

Измијте ги рацете, па премачкајте ги со хидратантен крем.

Сок од лимон за белење

Исто како сокот од портокал, и лимоновиот сок е полн со витамин Ц и поттикнува создавање на колаген, што резултира со цврсти и здрави нокти.

Лимонот може да се искористи и за белење на ноктите и отстранување на жолтите дамки кои се формираат на самиот нокт.

Најпрактично е да капнете неколку капки сок од лимон врз памукче, па да поминете со него преку ноктот и убаво да го истриете. Не ги мијте ноктите, туку оставете да го впијат сокот од лимон.

Масажа со маслиново масло

Маслиновото масло има витамин Е, состојка која ја поттикнува циркулацијата на крвта, а како резултат на тоа може да го забрза растот на ноктите.

Се препорачува ноктите да ги масирате со маслиново масло пред спиење.

Загрејте малку масло и масирајте ги ноктите и кутикулите околу 5 минути.

Потоа ставете ги рацете во ракавици и извадете ги дури следниот ден кога ќе станете од спиење.

Редовно потсекувајте ги

Ако сакате ноктите да ви растат побрзо, треба да ги потсекувате редовно, но и да се грижите за нив.

Тие треба да се суви и чисти за под нив да се не собираат бактерии.

Откако ќе ги исечете, обликувајте ги со ножички или турпија, а потоа премачкајте ги рацете со хидратантен крем.

И, најважно од сè - не ги грицкајте.

Користете лак за зацврстување

Кога се меки, ноктите лесно се превиткуваат и кршат.

Затоа повремено (и не премногу често), треба да ги премачкувате со лак за зацврстување, кој ќе го спречи нивното кршење.

Храна со биотин (витамин Б7)

Освен што му помага на телото да ја трансформира храната во енергија, биотинот е добар за зацврстување на ноктите и косата.

Овој витамин го има во сардините, бананите, варените јајца, печурките, сојата, во карфиолот и во квасецот.

А. Ј. | Црнобело