Најчестите симптоми на лајмска болест (што се добива од крлежи)

Лајмската болест се третира со антибиотици ако се забележи рано, па важно е да бидете свесни за симптомите, особено во сезоната на крлежи – инсектите што ја пренесуваат на луѓе.

Во пролет, кога сакаме да минуваме повеќе време надвор, една од најголемите опасности се инсектите.

Додека убодите од повеќето инсекти само предизвикуваат непријатно чешање, крлежите се сметаат за поопасни бидејќи можат да ве заразат со лајмска болест.

Важно е да знаете дека не секој крлеж ја пренесува болеста, туку само oние кои се заразени.

Лајмската болест е предизвикана од бактериите од видот Borreliea и може да се третира со антибиотици ако е дијагностицирана навреме. Токму и затоа е важно да бидете свесни за симптомите.

По убод од крлеж, веднаш одете на лекар доколку забележите некој од следниве симптоми:

Исип

Исипот што го предизвикува лајмската болест изгледа како црвена точка, околу која има црвен круг, односно личи на мета.

Овој исип може да биде блед и да не се познава на потемна кожа, а во 30% од случаите и воопшто не се појавува.

Исипот најчесто се појава околу 30 дена по убодот од крлеж.

Симптоми како на грип

Симптомите како треска, главоболка и болки по телото исто така можат да бидат предизвикани од лајмска болест.

Лесно е да ги игнорирате овие симптоми бидејќи ги чувствуваме сите кога сме настинати.

Но, ако сте имале убод од крлеж, подобро е да се консултирате со лекар за да бидете сигурни дека не станува збор за лајмска болест.

Замор

Ненадејниот замор може да биде еден од првите симптоми на лајмска болест.

И ова е симптом што обично го занемаруваме, но одете на лекар ако го чувствувате по убод од крлеж.

Други видови исип

Иако поретко, лајмската болест може да предизвика и други видови исип, како црвенило или мали точки на кожата.

По убод од крлеж, не го игнорирајте исипот, без разлика како изгледа, и консултирајте се со лекар.

Може ли да се спречи лајмската болест?

Секогаш е полесно да ја спречите заразата со лајмска болест, односно добро да се заштитите од крлежи.

Ако одите на место со висока трева, носете долги панталони и затворени чевли – истото важи и за вашите деца.

Не допирајте улични мачки и кучиња, а доколку имате миленик, купете соодветно средство за заштита од паразити како крлежи.

Ако сте биле во природа, секогаш е препорачливо внимателно да проверите дали вие или вашите деца имате убод од крлеж.

Доколку, пак, забележите крлеж на вас, не пробувајте да го извадите сами, туку одете на лекар и внимавајте на симптомите што ги спомнавме.

Прочитајте и: Сезона на крлежи: Зошто овие паразити се опасни, што да правите при убод и како да се заштитите?

Спирова С. | Црнобело