Грешки во чистењето на домот за кои не сте ни свесни дека ги правите

Дали прво ги чистите подовите? А, дали ја користите правосмукалката со преполн резервоар?

Чистењето е навика што треба да ја стекнеме сите и иако неизбежен дел од секојдневието, многумина прават некои грешки.

Со ова, само си ја отежнуваат работата и права целиот процес да трае многу подолго.

Шесте најчести грешки што можеби ги правите и вие:

Го триете тепихот кога чистите дамка

Триењето нема да ви биде многу од корист ако чистите дамка од тепихот.

Од една страна, може да го оштетите, а од друга, може да ја „втиснете“ дамката подлабоко во ткаенината.

Ако ви се истури нешто течно, најпрво треба да го впиете со хартиен бришач или крпа.

Потоа нанесете средство за чистење теписи, оставете да делува (според упатството), па со влажна крпа истапкајте ја дамката.

Ако дамката е веќе исушена, тогаш можеби ќе треба и да триете. Затоа важно е да го исчистите тепихот веднаш штом ви се истури нешто.

Ги чистите прозорците со кружни движења

Ако користите кружни движења, на прозорецот (или огледалото) ќе останат траги од средството.

Најдобро е прво да ги избришете со хоризонтални движења, а потоа уште еднаш, со вертикални.

Не сте трпеливи

Ако некое средство за чистење пишува дека треба да отстои, тогаш бидете трпеливи и почекајте.

Средствата за потврдокорни дамки, како во рерна, се мошне ефикасни, но само ако им дадете време да делуваат.

Дури и на средството да не е наведено да почекате, секогаш е подобро да го оставите неколку минути за да не мора да триете.

Тавите од леано железо ги чистите како другите садови

Тавите од леано железо се мошне квалитетни, но и поскапи, па сигурно не сакате да ги уништите.

Ваквите тави не треба да се чистат со средство за садови бидејќи ќе ги оштети и храната ќе почне да се лепи на нив.

Откако ќе завршите со готвење, оставете ја тавата да се исуши и отстранете ги остатоците од храна.

Потоа темелно измијте ја само со топла вода.

Дозволувате правосмукалката да се преполни

Не мора да ја празните правосмукалката по секое користење, но штом резервоарот е полн до половина, тогаш е време да ја исчистите.

Кога резервоарот е полн, правосмукалката не е исто ефикасна. Покрај тоа, побрзо се загрева и можете да ја оштетите.

Прво ги чистите подовите

Кога го средувате целиот дом, подовите треба да бидат последни.

Ако прво ги исчистите подовите, а потоа бришете прашина или ги средувате масите, подот пак ќе се извалка. И, ќе треба да го чистите уште еднаш.

Спирова С. | Црнобело