Како сами да си направите природен освежувач за домот?

Брзото темпо на живот нè тера да заборавиме колкава улога имаат лошите мириси врз нашето расположение и емоции.

Затоа, едноставно затворете ги очите и помислете на вашите омилени мириси: тоа може да биде мирисот на свежо печен леб, топло кафе, мирисот на морето или мирисот на дрвјата низ шумата. Чувствата кои ве преплавија се позитивни и ги отворивте очите со насмевка на лицето.

Токму затоа е важно вашиот дом да биде исполнет со пријатен мирис, кој ќе ви помогне да се опуштите после напорниот работен ден или времето поминато надвор од домот.

Следните 5 идеи за домашни освежувачи ќе ви покажат како на лесен и едноставен начин да внесете пријатен мирис во домот.

1. Јаболко, цимет, ѕвездест анасон и каранфилче

Комбинацијата на овие елементи веднаш ќе ве потсети на свежите летни ноќи. Исечете го јаболкото на тенки парчиња, ставете го во тегла и додадете вода. Потоа додадете неколку стапчиња цимет, неколку парчиња анасон и каранфилче. Можете да го менувате интензитетот на аромата така што ќе си играте со соодносот на состојки.

2. Лимон, лимета, рузмарин и ванила

Комбинацијата од рузмарин и ванила е нешто кое навистина ќе ви ги разгали сите сетила. Исечете ги лимонот и лиметата на парчиња, ставете ги во тегла и додадете вода. Додадете неколку капки екстракт од ванила, 3-4 гранчиња рузмарин и вашиот освежувач е веќе готов.

3. Лимон, мајчина душица, нане и ванила

Мајчината душица со својот специфичен мирис е таа која му дава нота на посебност на овој освежувач. Исечете го лимонот на тенки парчиња, ставете го во тегла и додадете вода. Потоа додадете неколку листови свежо нане и мајчина душица. Ако не можете да најдете свежи може да ставите и исушени. На крајот додадете неколку капки екстракт од ванила.

4. Портокал, ѓумбир и бадеми

Свежиот мирис на портокалот искомбиниран со специфичниот мирис на бадемот е тоа што ја прави оваа комбинација совршена. Исечете го портокалот на тенки парчиња, ставете го во тегла и додадете вода. Додадете и неколку парчиња лимон за да добиете посвежа арома. Додадете ѓумбир, исечкан на мали парчиња и неколку капки есенцијално масло од бадем.

5. Краставица, босилек и лимонова трева

Силниот мирис на босилекот измешан со свежината на краставицата и лимоновата трева за кратко време ќе стане вашата омилена арома во домот. Исечете неколку кругови краставица, ставете ги во тегла и додадете вода. Додадете неколку стебленца свеж босилек и неколку капки есенцијално масло од лимонова трева.

М. С. | Црнобело