Како да го средите гардероберот за само неколку минути?

Веројатно и на вас ви се случува, за само неколку дена, уредно здиплената гардероба да ја претворите во вистински хаос. Тоа е така од причина што многу често чуваме облека или накит, кои реално не ни се потребни.

Овој период од годината е оној во кој ја подготвуваме летната гардероба, а се ослободуваме од џемперите и зимските работи. Па, наместо постојано да ги туткате вашите алишта, борејќи се со малку слободниот простор, време е да го искористите овој период на промена на сезоните и да ги фрлите непотребните нешта.

Стари градници

Направете тест на вашите градници. Откако ќе ги облечете, на себе ставете само една тенка маичка. Доколку градите излегуваат од градникот или пак чувствувате неудобно стегање во делот на грбот, време е да се ослободите од градникот. Секако веќе никогаш нема да го облечете.

Подароци од поранешни партнери

Доколку имате парчиња облека кои пред неколку години ви ги подарило вашето поранешно момче, тоа не значи дека засекогаш треба да ги чувате. Ако облеката ви е мала, време е да ја дадете на некој на кој може да му користи. Не дозволувајте предметите да ве врзуваат за спомени.

Неудобни чевли

Со текот на годините, обликот на ногата се менува. Промените може да настанат во кој било период, од обично отекување на ногата, а најчесто се случува во текот на бременоста.

Па така, доколку не се чувствувате удобно во некои чевли, нема потреба да се малтретирате носејќи ги, ниту пак да дозволите да ви зафаќаат дел од просторот. Доколку не се многу износени, подарете ги некому, во спротивно фрлете ги.

С. У. | Црнобело