Кралско сини и пастелно сини - Велигденски јајца без капка хемикалија

Техника за природно добивање на сини нијанси на велигденските јајца која ќе ја користите секоја година понатаму...

Ви треба само виолетова зелка со средна големина, малку сода бикарбона и малку оцет.

Зелката исечете ја на поголеми парчиња, ставете ја во длабоко тенџере, прелијте со 500ml вода и оставете да се вари 35-40 минути на тивок оган.

Јајцата сварете ги посебно со малку сол.

Сварената зелка оставете ја малку да се олади, па процедете ја водата. Поделете во две посебни лончиња.

Во едното додадете 4 лажици оцет, а во другото - лажица сода бикарбона.

Во едниот сад ќе добиете виолетова течност, а во другата темно сина. Виолетовата ја дава кралско сината боја, а од сината ќе добиете пастелна нијанса.

Потопете ги јајцата во течностите, така што ќе бидат комплетно покриени. Може да отстојат околу половина час или повеќе, зависно од тоа колку интензивна боја сакате да добиете.

Една средна зелка е доволна за боење на 30 јајца. Најдобро е да користите бели јајца, за бојата да излезе поубава.

Никако не ги бришете јајцата кога ќе ги извадите од течноста, туку оставете ги сами да се исушат на парче хартија.

М. Д. | Црнобело