Совети за одгледување кротон – растение со уникатни листови кое бара посебна нега

Клучот за успешно одгледување на кротон е одржувањето на иста температура во секое време од годината. Кротонот е едно од ретките собни растенија на кои им е потребна светла положба.

Кротонот е растение кое има многу впечатливи листови. Но, за да ви успее одгледувањето на ова декоративно и шарено цвеќе, ќе треба да потрошите малку повеќе време и да вложите повеќе труд.

Откако ќе успеете, кротонот ќе биде една од најубавите декорации во вашиот дом.

Постојат повеќе видови кротони кои се разликуваат по бојата и големината на листовите. Може да бидат тесни и издолжени, но и со неправилни форми. Заедничко за сите е што листовите им се доста цврсти.

Во зависност од видот, сите имаат специфично изразена жолта, портокалова или розова нијанса. Колку повеќе е изложен на светлина, толку поживописни ќе бидат неговите бои.

Сите видови на кротон израснуваат во висина од 30 до 60 сантиметри и во ширина од 30 до 45 сантиметри. Доколку редовно се крои во текот на пролетта, кротонот ќе биде уште поразгранет.

Нега и грижа за кротон

Клучот за успешно одгледување на кротон е одржувањето на иста температура во секое време од годината. Кротонот е едно од ретките собни растенија на кои им е потребна светла положба.

Колку повеќе светлина му обезбедите на крoтонот, толку поубава боја на листовите ќе има.

Може да биде и на сонце, но не преку целиот ден. Кога е изложено на сонце, не треба да биде влажно, за да не се појават изгореници.

Температурата не смеете да му ја менувате многу, зашто тогаш растението може да се уништи.

Во лето полевајте го со вода умерено, еднаш до два пати неделно, а во зима еднаш неделно. Исто така, важно е да не дозволите почвата во саксијата да се исуши целосно, но и растението да не стои во вода.

За успешно растење ќе придонесе и секојдневното утринско прскање на листовите, за да му се обезбеди на растението потребната влажност, а за таа цел добро е да користите вода со помалку бигор.

Што се однесува до прихранувањето, најдобро за кротонот е да користите ѓубриво двапати месечно, со цел да го поттикнете неговиот раст.

Пресадување и кроење на кротон

Пресадувањето на кротонот може да го правите на секои две години. Ако пак штотуку сте го купиле растението, подобро е да почекате и да го пресадите кога веќе нема да му биде удобно во таа саксија, па ќе мора да го пресадите во поголема.

На кротонот не му треба драстично кроење, но ако сакате да го намалите волуменот на листовите, може да направите мало кроење.

Но, имајте предвид дека сокот од кротонот е отровен, па доколку имате мали деца или домашни миленичиња, многу е важно да не дојде во контакт со нив!

М. Ѓ. | Црнобело / фото: depositphotos.com