На гости кај Христина: Стан во Скопје од 80m2 уреден во минималистички стил со елементи од орев

Детали

сабота, 23 декември 2023

„Сакавме отворен простор со многу светлина, едноставен, со класичен, минималистички стил каде ќе преовладува белата боја со црни детали и елементи од орев за да ја разбиеме монотонијата. Мебелот е направен по нарачка за просторот да се искористи максимално“, вели Христина од Скопје за уредувањето на домот.

Христина Николовска Шурлановиќ (30), софтверски инженер во IT компанија, со сопругот живее во Скопје, во стан од 80m2. Во нивниот дом се само неколку месеци, поради што Христина вели дека на просторот му недостигаат детали, но како што постепено го уредуваат станот, така тој го добива ликот што таа и сопругот го замислиле.

Во овој светол простор доминираат белата боја и црните детали во минималистички стил, како и елементи од орев, кои му даваат топлина на просторот.

Покрај впечатливата уметничка слика со женски лик и сини бои, периодов во станот доминира елка со розови лампиони.

Христина, пак, за CRNOBELO.com вели дека обожава природно цвеќе, па затоа во нивниот дом скоро постојано има цвеќиња во вазна.

Таа ни раскажа како го уредиле станот:  

„Станот го уредувавме заедно со сопругот, иако морам да признаам дека ми остави простор јас да ‘замешам прсти’ малку повеќе.

Внатрешното уредување е нешто што секогаш ми било интересно, па воопшто не ми беше проблем да се 'пуштам' во процесот.

Ова ни е втор дом заедно. Првиот го уредивме многу едноставно во доминантно бела боја, а сега сакавме да експериментираме малку повеќе со деталите и боите, но сепак да се задржи минималистичкиот стил.

Имавме и консултација со архитект, но повеќе од технички аспект.

Во однос на дизајнот, тој беше главно наша желба.

Сакавме отворен простор со многу светлина, едноставност и практичност, а притоа да биде класичен, минималистички стил каде ќе преовладува белата боја со црни детали и некои елементи од орев за да ја разбиеме монотонијата.

Мебелот е направен по нарачка со цел просторот да се искористи максимално. Многу љубов и внимание е посветено во секој агол од станот.

Продолжува на следната страница...