Во домот на Катерина: Стан во Аеродром од 48m2, со кујна во пастелна минт боја и многу цвеќиња

Дополнително на зелената боја која го релаксира човековото око, во уредувањето присутен е дрво декорот кој го потенцира тој натурален (природен) ефект дополнително.

Кујната и спалната соба се изработени по принцип мебел по мерка, изборот на трпезариска маса беше масивно дрво со метални ногарки.

Јас по природа сум foodie и обожавам да готвам, така што кујната во мојот дом се користи максимално. За кујна која се користи често, а притоа истата е со помали димензии, за мене, еден од поважните фактори е да биде функционална, односно да ги има сите потребни елементи и сите слободно да се користат, а просторот до нив да не е ограничен.

Но што е функцијата ако ни недостасува изгледот?! Со дизајн (изглед) на функцијата добив кујна која ми го разубавува целиот простор во станот, а мене ми буди чувства и желба да поминувам повеќе време во тој простор испробувајќи различни рецепти.

Хоби ми е читањето на книги, па големата полица во спалната решив да ја претворам во мини библиотека, а во план е и изработка на втора поголема библиотека која ќе се вклопи во веќе дефинираниот ентериерен стил.

Јас сум голем љубител на растенија, па мои омилени детали во станот дефинитивно се растенијата кои ги имам во голем број и кои некако го разигруваат и освежуваат просторот.

Секое растение го сметам како посебен детаљ кој секако си бара нега и одржување. Со право можам да кажам дека уредувањето на просторот e исто така и биофиличен, а користењето на растенија во ентериерот произлегува од потребата да имам дел од природата во просторот во кој живеам.

Таа природа ми овозможува продуктивна и позитивна атмосфера, а истовремено претставува и декор во самото уредување.

Но растенијата за мене не се само естетски декор, туку го балансираат и подобруваат квалитетот на воздухот во станот, а тоа и како е потребно за средина како што е Скопје.

Домот го уредив со цел да изградам едно свое светло и пријатно катче, каде што секој елемент и детаљ ќе има свое место и приказна само за себе.

Повеќе фотографии од деталите во домот на Катерина:

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело