На гости кај Маги Медичи: Стан во Скопје со ретро современа естетика и готски призвук (фото)

Низ мојот дом, ретро современата естетика со готски призвук создава волшебна и визуелно впечатлива средина, која многу сакам да остави траен впечаток кај сите што влегуваат. А гости редовно имам и многу ми е важно да се чувствуваат пријатно, како дома.

Централно место на безвременската елеганција: Мермерната масичка за кафе.

Во срцето на дневната соба, неверојатната мермерна масичка за кафе стои како доказ за безвременската елеганција. Таа е елегантна и софистицирана.

Многу лутав додека не најдов нешто што ќе одговара на стилот, и ми беше најважно да имам перфектна масичка. За мене тоа е многу важно парче мебел-детаљ, а воедно и мој омилен.

Мазната, ладна површина на мермерот им дава елеганција на убавите украси.

Оваа масичка за кафе е уметничко дело кое го издигнува целокупниот амбиент на просторот. И затоа ми беше важно да е совршена.

Јас верувам дека стилот е во деталите, па покрај готските канделабри кои даваат драматична и интересна атмосфера на просторот, омилени ми се и нежните стаклени вазни-свеќници со неколку проѕирни форми, кои го рефлектираат топлиот сјај и создаваат чувство на етерична елеганција.

Овие волшебни парчиња не само што ми ја осветлуваат просторијата, туку служат и како прекрасни декоративни елементи, беспрекорно комбинирајќи ја ретро современата и готската естетика.

Сè што е во просторот се надополнува едно со друго.

Ми создаваат нервоза несредени и натрупани домови, па затоа секогаш се стремам да е украсено со вкус, смирени бои, и да е сè на свое место.

Сметам дека домот го отсликува и умот. Таа ми беше идејата и целта кога го замислував идеалниот хармоничен дом за живеење“.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело