Во празнично уредениот дом на актерката Маја Илијевски во Битола, со доминација на бела боја и златни детали

Детали

среда, 01 јануари 2025

„Секоја година ја дополнувам и по малку менувам колекцијата на украси со кои го декорирам мојот дом. Сè што сум купила или добила на подарок, ми буди убави емоции, а го поврзувам со различните фази од растењето на мојот син“, вели актерката  Маја Андоновска Илијевски за CRNOBELO.com.

Актерката, Маја Андоновска Илијевски, која воедно е и директор на НУ Центар за култура во Битола, има прекрасно уреден празничен дом.

Во куќата, во којашто живее со сопругот и синот, сè е украсено уште од почетокот на декември, а доминираат украси во бела боја.

Просторот дише со топлина, а Маја вели дека е многу среќна кога во времето на празниците, тука го поминува времето со саканите личности.

За празничното уредување на куќата во Битола, Маја ни раскажа низ разговорот за CRNOBELO.com:

„Најубавиот период од годината се празниците, а за мене е вистинска радост да го украсам домот и да уживам во магијата на миговите поминати со семејството.

Синот ми се вика Николај, па имаме и семејна слава Св. Никола, и воедно именден кога ни доаѓа најблиското семејство на вечера.

Божиќ, пак, е именден на мојот сопруг Ице и во тоа време куќата е отворена за сите наши роднини и пријатели.

Со оглед на динамиката која ни ја задава животот, ова се празници кои нè зближуваат, нè собираат, но се и празници кои нè потсетуваат на убавината на градење топли спомени.

Што се однесува до украсувањето, секоја година ја дополнувам и по малку менувам колекцијата на украси со кои го декорирам мојот дом.

Сè што сум купила или добила на подарок, ми е драго и ми буди убави емоции, а го поврзувам со различните фази од растењето на мојот син.

Секогаш сакам просторот да ми е во складни бои, па така си играм и со украсите.

Некако во овој период преовладува белата боја искомбинирана со сребрено и златно.

Ова ме асоцира на зимата и снежниот зимски период.

Елката секоја година јa украсувам сама, како изненадување за син ми, а неговата соба ја украсуваме заедно.

Сопругот, пак, го осветлува и украсува дворот на семејната куќа“.

Погледнете повеќе фотографии од празничниот дом на Маја:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело