На гости кај Елена: Стан од 170m2 на поткровје на Водно - огромна кујна и многу светлина (фото)

Детали

сабота, 20 март 2021

„Секое штрафче, секоја фуга, секој детаљ беше направен под мој надзор и со мој придонес. Работев заедно со мајсторите секојдневно, имам и свој алат, нетипично можеби за жена“, раскажува 40-годишната Елена Пискачева Курт.

Елена Пискачева Курт (40) е дипломиран инженер архитект, која со сопругот Неџат и двата сина Максим (11) и Габриел (7) живее во стан од 170м² на поткровје во скопската населба Водно.

Таа вели дека во животот живееле во неколку држави и во многу различни живеалишта, но дека на секое од нив сака да остави свој личен печат при уредувањето.

За уредувањето на нивниот стан на Водно, Елена споделува за CRNOBELO.com:

„Ние сме невообичаено семејство, живееме како номади. Во нашиот долгогодишен брак, заради природата на работата на мојот сопруг имаме сменето неколку држави и многу различни живеалишта. Со тоа спонтано се оствари мојата желба да купувам станови, ги реновирам, уредувам и да ги продаваме.

Јас и сопругот сме многу слични и не сме личности кои имаат за цел да создадат живеалиште и во истото да ја дочекаат својата старост. Сакаме промени, понекогаш дури и екстремни.

Станот во кој моментално живееме го посакував неколку години и успеавме да стане наш. Но, беше вистински предизвик да го реновирам целосно, буквално од корен што би се рекло, и да го дизајнирам, не толку по мој вкус, но затоа целосно по вкусот и желбите на мојот сопруг, а првенствено на нашите синови.

Но, кога сме кај нашите синови мора да кажам дека имаат навистина конкретни и специфични барања, а на мене беше одговорноста да им ги претворам сите барања во реалност.

Мојата потреба да имам целосна контрола врз работите со овој проект го достигна својот максимум. Секое штрафче, секоја фуга, секој детаљ беше направен под мој надзор и со мој придонес. Работев заедно со мајсторите секојдневно, имам и свој алат, нетипично можеби за жена.

Реновирањето траеше долги 6 месеци и сè уште станот не е готов според моите стандарди. Како се вселивме така почнав со работа на друг проект и нашиот стан остана недовршен. Никако да најдам време да одберам нови амбиентални ламби и лустери, а во кујната на некои места фали осветлување со лед диоди. Спалната исто така не е довршена според мојата замисла, но сето ова не го намалува нашето уживање во овој простран и целосно облеан со сонце стан.

Ориентацијата на станот, југо-запад, беше една од најважните причини за да се одлучиме за овој стан. Сметам дека ориентацијата е многу важна при избор на живеалиште.

Употребив земјени тонови, топли и пријатни, но темни, со намера, зошто станот има премногу светлина и доживувањето на темно сивите ѕидови и темниот мебел е сосема поинакво од тоа што првенствено би очекувале.

Продолжува на следната страна...