Кај Магдалена дома: Уредувањето на ходникот ми е погодок, но подот во кујната ми е промашување (фото)

„Плакарот за палта во ходникот ни е и погодок, но и промашување. Погодок е во смисла на тоа што сите јакни и палта се скриени внатре и токму тоа и ни беше целта – да ги избегнеме класичните закачалки во ходник кои мене лично ми изгледаат неуредно, но промашување ни е бидејќи не собира многу закачалки и е малку тесно“, раскажува 31-годишната Магдалена од Скопје.

Магдалена Костовска (31) е дипломиран преведувач, но и вљубеник во уредување на ентериерот. Нејзиниот стан во Скопје е уреден со многу внимание и љубов.

За CRNOBELO.com таа споделува искуства од уредувањето на нејзиниот дом:

„Иако не помина долго време откако се вселивме, речиси 3 години, сепак има одредени работи кои ако се вратиме наназад, би ги направиле малку поинаку. Би рекла дека сепак немаме многу промашувања. Секое делче е добро смислено пред да се реализира.

Во однос на кујната, како промашување можам да го наведам тоа што шкафчињата не се до горе. И вака има простор, но така би имало повеќе, а кога станува збор за кујна, повеќе простор за складирање е секогаш добредојден.

Плакарот за палта во ходникот ни е и погодок, и промашување. Погодок е во смисла на тоа што сите јакни и палта се скриени внатре и токму тоа и ни беше целта – да ги избегнеме класичните закачалки во ходник кои мене лично ми изгледаат неуредно и наместо тоа, сите палта, јакни и сл. да се средени внатре. Но промашување ни е бидејќи не собира многу закачалки и е малку тесно.

Би рекла дека погодок ни е целиот изглед на ходникот. Прво, тоа што го оставивме отворен, без да ставаме дополнителен ѕид или гипс-картон, овозможи станот да не изгуби од природната светлина, а сепак просторот визуелно да се подели. Вака изгледа како мала, посебна просторија во која сè си има своја функција.

Уште еден погодок е тоа што немаме многу отворени полици. Знам дека потешко се одржуваат, повеќе фаќаат прашина и не се многу практични, па појдовме од тоа и многу работи ни се во затворени шкафчиња, освен неколку делови каде се разбира имаме декорации.

Продолжува на следната страна...