„Живеам во најмалиот стан во Њујорк од само 9m² - како функционирам?“

Како изгледа животот во стан од само 9m²? Дали ова навистина е најмалиот стан во Њујорк? Дечкото што живее во него споделува трикови за функционирање во мал простор...

Рон Ервин е комичар и актер од САД кој живее во еден од најмалите станови во Њујорк и тоа со вкупна површина од само 9m². Тој дури тврди дека станува збор за буквално најмалиот стан во Њујорк.

Месечната кирија му е 850 евра, а Ервин вели дека си има трикови како максимално да го искористи просторот.

Тој пред една година се доселил во Њујорк и поради високите кирии морал да научи како да се снаоѓа во ваков мал простор.

Во неговиот стан, односно во единствената соба, тој има мал фрижидер, кревет, плакарче со фиоки, ламба, метална конструкција за облека, како и плакарчиња за складирање на храна, козметика и средства.

Тоалетот е надвор од станот на Ервин и е заеднички со другите потстанари во објектот, но со оглед на тоа што нема други потстанари, Ервин вели дека е само за него.

Тој споделува неколку совети како полесно да функционирате ако живеете во мал простор:

- Не треба да поседувате многу работи или ако поседувате треба да се ослободите од нив и да ги оставите само најнеопходните.

- Мора сè да биде едноставно и постојано уредно, затоа што нередот во мал стан ситуацијата ја прави 10 пати полоша од што е.

- Главен трик за максимално користење на просторот е повеќенаменска употреба на работите и многу фиоки. Тој вели дека плакарчето со фиоки може да се користи и како работно биро.

- За складирање најдобро место е просторот под креветот, а и вертикално закачување, односно работи да висат од таванот или на ѕид.

- Вели дека мора да го адаптирате својот животен стил и да функционирате без работите кои ги немате во домот.

- Најдобар совет од сите кога живеете во мал стан, Ервин вели дека е да излегувате најмногу што можете, особено во градови како Њујорк каде сè е надвор и градот е совршено место за да ви биде „дневна соба“.

С. С. | Црнобело