Гравот се потопува во сода – Кујнски трикови на ориенталните готвачи

Оризот треба да се потопи пред да се зготви

Во западните земји често оризот само се мие, пред да почне да се готви.

Ориенталните готвачи, пак, веруваат дека оризот треба да отстои потопен два или повеќе часа, со цел да не биде толку леплив и да биде повкусен.

Јајцата се пржат во бакарни садови

Бакарните садови, кај нас полека се исфрлаат од употреба, но во Турција јајцата за појадок се приготвуваат токму во нив.

Тајната е тоа што бакарот многу лесно ја спроведува топлината и овозможува рамномерно приготвување на јајцата.

Затоа многу полесно ќе добиете рамномерно испржени јајца, наместо да бидат загорени по краевите, а живи во средина.

Ориганото и мајчината душица се користат како додатоци

Мајчината душица кај нас најчесто се користи за чај, но таа е вклучена во голем број мешавини од зачини што ги користат ориенталните готвачи.

Така на пример, популарната мешавина од зачини, позната како za’atar се состои од сусам, сол, мајчина душица и оригано, а се користи како додаток за пити.

Овој зачин во ориенталната кујна се користи како што ние користиме сол и бибер, или, зачин од сушен зеленчук.

Циметот не е наменет само за десерти

Кај нас циметот се користи најчесто за чаеви, сутлијаш, или во одредени десерти.

Во Сирија, верувале или не, подготвуваат шпагети со цимет и доматен сос.

Гравот треба да се потопи во раствор со сода бикарбона

Гравот е традиционално јадење и кај нас, но и во голем број ориентални земји. И кај нас голем број од домаќинките имаат навика да го потопуваат преку ноќ гравот, за да немате гасови од него, но ориенталните готвачи додаваат уште една состојка.

Тие веруваат дека гравот треба да се потопи во вода во која има растворено 1 лажичка сода бикарбона, за полесно да се свари, но и да немате проблеми со гасовите.

Пред да почне да се приготвува гравот, потребно е убаво да се измие, затоа што содата ќе направи пена додека се приготвува и ќе му даде непријатен вкус.

Исто така, солта треба да се додаде во последен момент, дури откако ќе се зготви гравот.

Б. С. Б. | Црнобело