Анита Тасева: „Бев на Кочулските Водопади во близина на Валадово, малку се измачив со патеката, но вредеше“

„За Кочулските водопади, во близина на градот Валандово, слушав многу убави работи од луѓе што ги посетиле, па одлучив и јас да ги посетам. Кога стигнав на крајот од селото Бајрамбос ме пречекаа пријатни мештани и ми кажаа насоки за водопадите...“

Анита Тасева од Нов Дојран, вљубеник во природа и планинарски тури, за CRNOBELO.com говори за една од нејзините омилени дестинации во Македонија, а тоа се Кочулските Водопади во близина на градот Валандово.

Анита споделува какво искуство ѝ била посетата на Кочулските Водопади:

„Како дете израснато на село и опкружена со природа, отсекогаш ме привлекувале откривања и запознавање на нови природни богатства кои ни ги нуди нашето македонско поднебје.

По многу посетени туристички места, цркви, манастири итн., некако ми недостасуваше да ја запознаам и природата која не е така лесно достапна, па одлучив да се приклучам кон планинарењето, каде имам можност да го почувствувам звукот и мирисот на природата. 

За Кочулските водопади, во близина на градот Валандово, слушав многу од луѓе што ги посетиле, па си ставив за цел дека морам и јас да видам за што станува збор.

Живеам во Дојран, па тргнав кон Валандово преку турските села Чалакли и Башибос до Бајрамбос (дотука води асфалтен убав пат).

Патував 35 километри од Дојран, а од Валандово водопадот е оддалечен околу 17km. Дотука може да се дојде и со обично возило.

На крај од село Бајрамбос, покрај самиот пат, се наоѓа фарма со крави која ја имаат мештани од селото, луѓе кои се многу пријатни и гостољубиви и несебично раскажуваат на секој добронамерник како да се стигне до водопадот.

Оттука нагоре продолжува земјен пат кој е погоден за теренски возила, недалеку над селото се пристигнува до патеката која води накај водопадот. 

На самиот почеток на патеката има летниковци за излет каде има можност да се приготви и скара до летниковците и има чешма со природна планинска вода.

Патеката ме насочи кон падините на Беласица од каде се наслушнуваше звукот на течението на реката.

Самата патека е обезбедена со огради на критичните места бидејќи пределот е стрмен, долж патеката има поставено клупи и корпи за отпадоци каде може да одморите, доколку не сте во добра кондиција (овој дел од патеката е долг околу 600 метри).

Продолжува на следната страница...