Марко Џамбазоски: „Сакам да истражувам и да покажам дека Македонија е многу повеќе од Скопје и Охрид“

На овој начин успеа да ја истражиш и традиционалната кујна на Македонија. Кои јадења те оставија без збор?

Уф, морам да признаам дека уживам во храна, а особено во храна која е подготвена со љубов. Интересно е дека тоа што во суштина го избегнувам дома во Скопје, уживам да го јадам кога сум на некое од моите патувања.

На пример, никогаш не сум бил преголем љубител на сирење, но не можам да го заборавам тоа на тетка Бојана и нејзиниот сопруг Војо во село Стањевци, кои откако нѐ видоа веднаш нѐ повикаа на гости, среќни дека ќе имаат со кого да го поделат свежо приготвеното домашно сирење.

Домашните зелници се исто така нешто што не би го одбил, но, можеби најмногу уживам кога некој ќе нѐ пречека со домашен сок од малини или капини, особено во летните горештини.

За секое село кружат различни приказни. Кои легенди ти се посебно интересни за македонските села?

Секое село крие некоја легенда и навистина е интересно да ги слушаш овие преданија раскажани од самите селани. Едно од поомилените ми е легендата за камената свадба во Куклица.

Но, исто така ме интересираат и оние вистински приказни, како на пример онаа за настанувањето на едно од најмладите природни езера на овие простори - Моклишкото езеро, една трагична приказна во која пред 67 години животот го губат 11 жители на селото кои остануваат затрупани под километарска земјена лавина.

Оваа голема количина на земја ја преградила долината на Бунарска Река и така од трагедија се родило ова живописно и уникатно езеро кое денес изнудува воздишки.

 

Често знаеш и да кампуваш за време на твоите патувања. Кои локации се најпогодни за поставување на шатор? 

Првата асоцијација за кампување ми е некаде покрај вода или некој убав панорамски поглед од височина. Доколку во овој момент би се решил да кампувам можеби би поставил шатор на Топлите Вирови, Сифулајка, ридот покрај Раштак, некаде на Кожуф или покрај Преспанското езеро.

Тука може да го завршиме разговорот. Кои места планираш да ги посетиш во следниот период?

И јас се прашувам каде ќе ме однесе следната авантура бидејќи ретко правам планови и сакам да патувам спонтано, па веројатно ќе дознаете од некоја наредна објава на Инстаграм.

© CRNOBELO.com Забрането преземање и копирање. Крадењето на авторски текстови е казниво со закон.

 Е. Х. | Црнобело