Ива од Скопје за одморот на Малдиви со две мали деца: „Сменивме 3 авиони и глисер, патот е напорен, но искуството фантастично“

Успеавте ли да отидете на некои од екскурзиите кои се нудат на Малдиви – нуркање, хранење ајкули или сепак поминавте мирен одмор?

На дечиња под 4 години генерално им е забрането да одат на сите екскурзии кои се нудат, така што во нашата ситуација мирен одмор беше едниствената опција. Но, имавме можност да изнајмиме пераи и маска и бевме на рекреативно нуркање, секако без дечињата.

Додека еден родител нуркаше, другиот ги чуваше и така се менувавме.

Индискиот океан е многу богат со морски свет, па при нуркањето видовме разновидни риби и корали. Исто така, на самиот отров имаше определено место за разглед на подводниот свет, каде што успеавме да видиме ајкули, бебе-ајкули, раи и желки.

Би ги препорачале Малдивите како дестинација за семејства со деца?

Малдивите имаат репутација дека се дестинација за меден месец, но иако ова е донекаде точно, тие се исто така и неверојатно место за пасивен семеен одмор. Ако сакате на вашите малечки да им покажете рајски пејзажи - тие се совршена дестинација.

Исто така, би рекла дека одењето на Малдиви со мали деца или со доенчиња е супер идеја затоа што не им требаат толку разновидни активности како на поголемите деца, така што бавниот и тивок островски живот подобро им одговара.

Во нашиот ресорт секако имаше доста активности организирани од детскиот клуб кои се одвиваа три пати на ден и тоа наутро, попладне и навечер. Имаше интересни активности кои беа соодветни и за поголемото детенце како уметност на кокоси и листови, оригами работилница, градење на замоци од песок, кино вечер итн. Во склоп на детскиот клуб имаше и игротека за дечињата.

Децата под 3 години мораа секогаш да бидат во придружба на родител, додека пак за децата од 3-12 години има задолжени детски аниматори кои го организираат денот и активностите и се грижат за нив.

 ©CRNOBELO.com Забрането преземање и копирање. Крадењето на авторски текстови е казниво со закон.

Е. П. | Црнобело