Денис Давитковски живее во Барселона: „Локалците постојано делат комплименти, но има кражби на секој чекор“

Детали

недела, 24 декември 2023

„Барселона е топла овој период од годината. Ми беше необично кога го гледав китењето на градот на сонце и температура од 17 степени. Иако мислев дека божикните и новогодишните денови се пропратени со снег, овој пат ќе ги дочекам со сладолед и очила за сонцe“, вели Денис Давитковски од Куманово кој живее во Барселона.

Во интервју за CRNOBELO.com, Денис зборува за животот во Барселона:

Како за почеток ќе те прашам како изгледа еден твој обичен ден во Барселона?

Би рекол, необично! Прага ме навикна на некоја рутина. Се будиш, одиш на работа, пиеш некое кафе со друштво и право во кревет. Петок и сабота излегување.

Барселона е толку хаотична и раздвижена, тука не ги чекаш петок, сабота или недела за да се забавуваш. Секој ден нешто се случува. Луѓето се полни со енергија, па си велам дали времето навистина влијае на психата.

Моментално покрај уметничкиот живот и проектите, работам и во хостел и очајно барам баланс и рутина, ама тинејџерот во мене е толку разбуден што секој ден после работа мора излегување и дружење со новите пријатели.

Ајде, си повторувам се навикнувам на времето. Сум немал зима со 17 степени.

Кои се твоите омилени скриени местенца што туристите најчесто ги занемаруваат?

Ги има многу. Да бидам искрен, за туристичките работи и не сум нешто премногу запознаен. Навистина влегов во некој елемент, да го научам јазикот, акцентот, да се доближам поблиску до локалците и нивниот начин на живот, да запознавам нови луѓе…

По пристигнување во Барселона, прво цел месец ги истражував плажите. Барселона и трите наредни плажи се најпосетуваните каде што туристите, а исто така и локалците првично одат. Но, на само неколку минути подалеку пропуштаат навистина предобри плажи.

На пример – Бадалона е една од плажите кај што одев најмногу ова лето и се наоѓа на 30 минути од Барселона. Ќе го спомнам и малото гратче Ситгес каде што не можеш да се одвоиш од убавината на плажата.

Ако Барселона е лик, како би го опишал?

Нели од „Вавилон“. Не преувеличувам, Барселона е уникатен град за живеење и доколку го имате гледано филмот ќе сфатите за што зборувам.

Според тебе, кои песни најдобро би одговарале со духот на Барселона?

Секоја можна поп и латино музика, како и хитовите на радио. Како што пее Шакира: „Hips don’t lie“. Е па истото го мислам за Шпанците. Си ја имаат таа страст.

Јас себеси почнав да се нарекувам човек-камелеон, се будам со џез, слушам цел ден латино и навечер завршувам на некое техно журче. Ете така!

Имаше ли некое културно недоразбирање што си го доживеал во Барселона?

Речникот на Шпанците и топлината што ја носат. Секоја втора реченица им е некоја пофалба или убав збор за душа. Кај и да влезеш ќе бидеш поздравен со: здраво убавецу, здраво кралу, здраво љубов моја…

Верувајте на шпански звучи поубаво! Ама ете, тоа го издвојувам како убава карактеристика. Како градот да се има договорено да дели радост на дневно ниво.

Продолжува на следната страница...