Ристе од Скопје за посетата на Лондон: „Авионски билет се наоѓа и за 20€, градот е многу небезбеден последниве години“

Но, секако во ноќниот живот морам да ги вклучам и безбројните театри и мјузикли.

Овој пат бев на мјузиклот за Мајкл Џексон и беше вонсериско и емотивно искуство.

Иако беше строго забрането снимање и сликање, сепак успеав да направам барем некое видео за спомен.

Каков впечаток ти оставија Британците како народ?

Во денешно време сè поретко можеш да сретнеш вистински Британец во центарот на Лондон.

Како што ги нарекуваат многумина, „вистинските Британци“ повеќе не живеат во централните делови, туку во предградијата.

Доколку навистина сакате да ја почувствувате британската култура и начинот на живот, најдобро е да се прошетате низ тивко, мирно предградие кое изгледа како да е заборавено од времето.

Токму таму, според мене, се крие вистинската магија и духот на еден англиски народ.

Јас лично посакав да го откријам тој дел од нивниот живот, па често знаев да заминам на една таква прошетка и да почувствувам како е да си Британец, што во суштина имам позитивно и топло искуство.

Како народ се грижливи, културни и доста гостопримливи. Често се собираат по дома на чај или на вечера со чаша вино, што им дава посебен шарм и чувство на блискост.

А британската храна?

Па, да речеме дека британската храна не ми е баш најомилена и избор на храна.

Имаат обилен  доручек и воглавно храната им е пржена, скоро секаде може да најдете Fish and chips ресторани.

Од британската храна некако најмоилени ми беа питите (благи и солени) и lemon polenta cake.

Од ритуалите, нешто што успеав и почнав да го применувам е пиењето чај со млеко (органско).

Инаку, со традиционалниот британски ритуал „попладневен чај“ се запознав првпат уште во студентските денови кога бев со Work and Travel програмата на работа во Америка.

Дел од моите обврски како вработен во тамошниот резорт беше и служењето на пладневениот чај.

Тогаш ги научив и совладав различните видови чаеви кои се служат, како и типичната закуска што го придружува чајот - комбинација од солени и благи колачи.

Посети ли некој ресторан или кафуле што многу ти се допадна и е по нешто специфично? Како се движат цените на пијалаците, храната, кафето..?

Најмногу посетував кафулиња бидејќи имам пасија за тоа. Каде и да патувам, секогаш сакам да откривам нови места со добра атмосфера и вкусна понуда.

Во последно време консумирам безкофеинско кафе или мача, кои во Лондон можат да се најдат скоро на секој чекор.

Меѓу најомилените ќе ги спомнам Avobar каде може да пробате мача со кокосова вода, Tomtom превкусна супа од тиква, Fortitude Bakehouse полнети крофни со крем и торта од палента.

Од рестораните особено ме воодушеви Booking office кој датира уште од 1869 година и има уникатен историски шарм.

Цените можам да признаам дека не се нешто повисоки од оние во Скопје. Кафето или чајот чинат од 2,50 до 4 фунти (170-280 денари), зависи дали пиете дупло еспресо, американо или капучино.

Дополнително убаво е што не се наплаќа екстра доколку сакате заменски млеко, како бадемово, овесно или кокосово.

Кога станува збор за храната, сè зависи од тоа каде преферирате да јадете.

Доколку е тоа ресторан оброк по лице би ве чинело приближно 20-30 фунти. Секако, секогаш постојат и поевтини, но подеднакво интересни опции, како што се маркетите на отворено.

Меѓу нив еден од најпознатите е Borough market, каде што може да уживате во разни оброци од најразновидни кујни по навистина пристапни цени.

И да, скоро секаде и секогаш може да плаќате со банкарска картичка т.е безготовинското плаќање е и единствениот начин на плаќање во поголемиот дел од локалите.

Каков е градскиот превоз? Што користеше најчесто и како се снајде во нивното метро?

Со оглед на тоа дека бев сместен нешто подалеку од центарот на градот, морав да комбинирам превоз, но најчесто го користев метрото како најбрза варијанта.

И да признаам, доста умешно се снаоѓам низ цел тој систем кој навидум е доста хаотичен.

Градскиот превоз е можеби нешто што ќе ве чини најмногу во Лондон, а и пошироко, доколку патувате низ Англија.

Иако системот функционира одлично и е добро организиран, имате разни опции како автобуси, метро превоз, убер или такси, електрични или обични велосипеди, сепак најповолна варијанта е автобускиот превоз кој чини 1,80 фунти за едно возење.

А предност е што добивате панорамско разгледување на градот со двокатните автобуси.

Билетот за метрото чини 3,50 фунти во еден правец до максимални 9 фунти доколку го користите цел ден низ првите две зони.

Возот е сепак најскапиот превоз, особено доколку го користите за трансфер до некој од аеродромите во Лондон, и во тој случај билетот чини околу 25 финти во правец.

Какво беше времето? Дали и понатаму важи она дека скоро цело време во Лондон врне?

Дожд, дожд и само дожд. Се шегувам. Да, иако Лондон важи за град кој постојано е влажен и врне, сепак за некое чудо мене ме послужи времето баш како што треба.

Не заврна ни еден ден, а тоа ми овозможи да посетам повеќе места и да направам убави фотографии.

Морам да кажам дека повеќе од дожд ми пречи силниот ветер. Бидејќи таму знае да дува силен и студен ветер, колку и да е сончево, тешко е нормално да се движите по улица, а уште потешко да направите убава фотографија.

Би го посетил ли Лондон пак? Што сакаше да видиш, ама немаше време овој пат?

Секогаш, Лондон нуди несекојдневни активности и можност да си најдете занимација во кој било период од годината, било тоа да е зима или лето.

За некоја наредна посета повторно си ги оставив Оксфорд и Кембриџ, кои се доволно блиску за еднодневна екскурзија од Лондон, да отидам на уште некој мјузикл и можноста да пијам чај во Бакингемската палата.

Повеќе фотографии на следната страница...