Ристе од Скопје за посетата на Лондон: „Авионски билет се наоѓа и за 20€, градот е многу небезбеден последниве години“

Детали

недела, 16 ноември 2025

„Туристичка виза за Британија се добива исклучиво преку онлајн апликација бидејќи кај нас нема британско дипломатско претставништво, а цената за виза со важност до 6 месеци е 120-130€, но со дополнителни административни трошоци и услуги на агенцијата може да достигне и до 250€“, вели Ристе Ќандовски за CRNOBELO.com, откако во изминативе месеци двапати го посети Лондон.

Ристе Ќандовски (42) од Скопје, по професија е стоматолог кој работи во фармацевтска компанија.  Тој ужива да патувам, а фотографијата му е голема страст откако памети за себе.

Тој неодамна беше на патување во Англија, а посетата на земјата не му е прва, зашто таму има роднини.

Овој пат, Ристе беше 10 дена во Лондон, и тоа само неколку месеци откако летото беше таму, специјално за концертот на Бијонсе.

За своето последно патување на „островот“, Ристе раскажа во разговор за CRNOBELO.com:

Колку време беше во Англија и дали освен Лондон или посети и други места?

Мојата последна посета на Англија, поточно во Лондон траеше 10 дена.

Главната причина за моите патувања таму е прво посета на мојата фамилија, и засега е исклучиво туристичка.

Досега имам отидено неколку пати, меѓу кои и за концертот на Бијонсе, кој се одржа годинава, на почетокот од јуни.

Тогаш, ете, иако тоа беше една од главните причини за мојата посета, сепак успеав да отидам малку подалеку од Лондон и да посетам уште еден прекрасен град, Единбург во Шкотска.

Можам да кажам дека Единбург е како од бајка, на моменти имате чувство дека сте дел од филмскиот сет на „Хари Потер”.

И, секако, „Хари Потер“ е искористен на секој можен начин за да се прослави градот.

Таму дознав еден интересен факт - дека имињата на дел од ликовите во книгата биле земени од надгробните споменици на едни гробишта во Единбург.

Како стигна до Лондон и колку чинат отприлика авионските билети?

До Лондон од Скопје се стигнува со директен лет преку WizzAir, а билетите обично чинат 20-25 евра во еден правец, освен во летниот период, во јули и август, кога цената им е доста повисока па достигнува и до 150 ера во еден правец.

Но, до Лондон имам летано и од Приштина, а цената тогаш беше 15 евра. Оттаму имате летови до Лондон секој ден во неделата.

За разлика од порано, денес е многу поедноставно да ја направите оваа конекција и тоа навистина е привилегија за оние кои сакаат да патуваат.

А каква е процедурата за добивање британска виза?

Туристичка виза за Велика Британија и Северна Ирска се добива исклучиво преку онлајн апликација бидејќи кај нас нема британско дипломатско претставништво.

Процесот се спроведува преку агенцијата VFS Global, која делува како посредник во постапката за визи и се наоѓа во Скопје и не е потребно да се излегува надвор од државата бидејќи пасошот се предава кај нив.

Цената за стандардна туристичка виза со важност до 6 месеци изнесува 120-130 евра, но со дополнителни административни трошоци и услуги на агенцијата може да достигне и вкупно околку 250 евра.

Од сè што виде во Лондон, што ти остави најубав впечаток, а што не ти се допадна?

Лондон е навистина огромен град во кој секојдневно циркулира милионска бројка на луѓе и посетители.

Поради тоа понекогаш е тешко да се посетат сите атракции и места што вреди да се видат.

Иако сум бил повеќепати, сè уште не сум успеал да ги посетам сите локации што ги имам означено на Google maps, а верувајте има многу!

Но, ете, од местата кои ми оставија најубав впечаток би ги издвоил Nothing Hill со своите шарени фасади на типичните британски куќи, Canary Wharf и City of London со високите и модерни облакодри, како и Camden Town, артистичен дел полн со улична уменост, каде што се наоѓаат муралот и статуата на Ејми Вајнхаус.

Особено ми се допадна возењето со жичницата преку реката Темза, како и St. Pancras железничката станица и истоимениот хотел, препознатлив по спотот Wannabe на поп-групата Spice Girls.

Панорамскиот поглед од Horizon 22, еден од највисоките облакодери во градот, е навистина впечатлив.

Hyde Park е прекрасен и зелен предел коj изобилува со убави градини, природа и животински свет, а деловите Belgravia и Marylebone изобилуваат со безброј шармантни кафулиња и ресторани меѓу нив и познатиот Harry’s Bar, омиленото место на Бијонсе, една од најголемите музички имиња и за мене артист No.1.

Секако, не може да се изостави Тower Bridge, еден од најпознатите симболи на Лондон, кој често се меша со London Brigde, иако вториот е многу обичен и неатрактивен.

Посебно ме воодушевија бројните музеи, од кои многу се бесплатни, а би ги издвоил Националната галерија, Природно-научниот музеј, Музејот за дизајн, Музејот на Викторија и Алберт.

Она што не ми се допадна е тоа што во последните година-две Лондон се смета за понебезбеден град за разлика од порано.

Сè почесто се случуваат разни видови криминал, особено кражби на мобилни телефони од случајни минувачи.

Овој проблем веќе не ги засега само туристите, туку и самите локалци кои секојдневно се соочуваат со т.н. џепчии. За среќа, лично, не сум имал такво лошо искуство.

Имаше ли можност да го искусиш ноќниот живот?

Ноќниот живот, баровите и дискотеките, се неизибежна станица кога сте во Лондон.

Има толку многу избор на разноразни барови за сечиј вкус.

Од класичните британски пабови, до клубови кои ве враќаат во ’90-тите, silent party односно клуб во кои музиката ја слушате само преку слушалки, караоке забави и тематски забави од сите стилови.

Продолжува на следната страница...