На одмор со Агнеса во Неа Мудања: „Бев со ќерките и мајка ми, вечера со морско во таверна чинеше 55€ за четворица“

Искрено, јас сум многу едноставна кога станува збор за плажа. Не сум од оние што носат многу работи со себе и можам речиси без сè.

Што се однесува до стилот за на одмор, и таму сакам сè да биде складно и во тон.

Не се работи за тоа да биде скапо или претерано, туку да ми создава убаво чувство.

Уживам во деталите и сакам сè околу мене да изгледа уредно и естетски. По природа сум таква и дома.

Сакам дури и најмалите детали да бидат убави, бидејќи верувам дека тие го создаваат целокупното чувство.

На пример, многу повеќе уживам кога водата е послужена во убава кристална чаша.

Можеби звучи необично, но мислам дека прво уживаат очите, а потоа и сите останати сетила.

Кога околината е убава, и самиот момент некако станува поубав.

Оваа година, пак, на море со особено задоволство носам исклучиво модели од мојата колекција OA Collection.

Најубаво е чувството кога го носиш она што сам си го создал, знаејќи колку љубов, труд и внимание се вложени во секое парче.

Искрено, мене секогаш ми е убаво кога сум на море, без разлика каде сум. Но, Неа Мудања навистина има посебен шарм.

Има прекрасно шеталиште, многу таверни и различни бич-барови, па секој може да најде место по свој вкус.

Исто така, има и плажи каде што можете едноставно да си поставите пешкир и да уживате.

А она што најмногу ми остави впечаток е организацијата. Сè е многу чисто, уредно и функционира беспрекорно.

Персоналот е исклучително љубезен и навистина прави да се чувствувате како ценети гости.

Услугата е брза, речиси и да не чекате, пијалакот пристигнува за само неколку минути.

Искрено, пријатно се изненадив и од цените. За чадор и две лежалки се плаќаат 25 евра, но тие пари не се дополнителен трошок - ги користите за храна и пијалаци во бич-барот.

И цените во рестораните ми се сосема прифатливи. На пример, четворица јадевме свежа морска храна и сметката изнесуваше околу 55 евра.

Искрено, за истото тоа кај нас би платиле многу повеќе. Односот цена-квалитет навистина е одличен.

А, како личност што сака убави фотографии, можам да кажам дека речиси на секој чекор има прекрасни места за фотографирање.

Што се однесува до водата, таа во овој период е прекрасна, топла и многу пријатна, а јас најмногу уживам кога со часови лежам на душек.

Јас сум од оние среќници што многу брзо добиваат боја. Доволни се неколку дена на сонце и веднаш се забележува тенот, секако со внимателно сончање и заштита на кожата.

Не сум личност што сака ноќен живот, па многу ретко може да се случи да одам во клуб.

За мене вистински одмор се мирни вечери, добра храна, убав разговор и време поминато со најблиските.

Токму тие едноставни моменти ми остануваат најубав спомен од секое летување. Ние и во секојдневниот живот сме многу поврзани.

Моите две ќерки живеат со мене, па секој ден поминат заедно ни е убав. Имаме посебен однос, многу сме блиски, смирени и речиси сè правиме заедно.

Дури и Тифани понекогаш сака да ме изненади и сама да ми зготви.

А, кога ќе заминеме на одмор, тоа време ни е уште повредно. Едвај чекаме да бидеме само ние, да се смееме, да разговараме и да создаваме нови спомени.

Иако сум јавна личност, многу внимавам кога станува збор за моите деца.

Не сакам да ги експонирам на социјалните мрежи и секогаш се трудам да ја зачувам нивната приватност.

Само кога тие самите ќе посакаат, тогаш споделувам заеднички моменти.

По природа сум многу заштитнички настроена и тоа никогаш нема да се промени“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело