Бојан Најдов за животот во Јужна Африка: „Лесно е да видиш жирафи, зебри, бафала, но има многу криминал и напади“

Зошто после студирањето во Македонија и Америка повторно се врати во Јужна Африка?

Во тоа време, пред седум години, не ми се допаѓаше ниту Европа, ниту Америка, а не можев да се замислам да живеам во Сингапур или Хонгконг, па се одлучив да се вратам во Јужна Африка бидејќи бев навикнат и имаш добри можности за вработување.

Повеќе сакам да работам и живеам во земји во развој, отколку во веќе развиени земји.

Во последниве три години живееш на релација Македонија-Јужна Африка. Што е слично, а што различно во овие две земји?

И двете, за жал, се земји каде сè се постигнува со врски. И двете се земји во развој, со голем процент на иселеништво. Но, од друга страна има друштвени и пријатни луѓе.

Разликата е што во Јужна Африка можеш да си никој и пак да имаш добра работна позиција, да напредуваш и супер да се забавуваш, додека во Скопје мора да си некој или да знаеш некој дури и за да влезеш во бар или ноќен клуб.

Што најмногу ти се допаѓа во Јужна Африка?

Квалитетот на животот, климата и храната, ноќниот живот и целата природа. Многу е лесно да видиш диви животни како жирафи, зебри, бафала, а сакам да ги посетувам и резерватите, кои се дом на лавови, гепарди и слонови.

А што не ти се допаѓа?

Тоа што не е безбедно, многу криминал, грабежи и напади. Исто така не ми допаѓа што имаат високи даноци и ниска вредност на националната валута, јужноафрикански Ранд.

Каков е животниот стандард и цените во Јужна Африка?

Со оглед дека има добар квалитет на живот во безбедните населби и краеви, не е толку скапо.

Кирија во безбедниот дел на градот е околу 500 евра, додека во лошите населби се наоѓа и за 200 евра. Цените во супермаркетите се за околу 20 проценти поскапи од Македонија. Леб и млеко е од 40 до 60 денари. Пицата чини од 350 до 600 денари, пиво во бар од 100 до 200 денари, а за кафе би потрошиле најмногу до 200 денари.

Каква е јужноафриканската кујна, што најмногу се јаде?

Јужноафриканците, од сите националности кои живеат таму , обожаваат да јадат, а традиционално им е braai или скара. Секој викенд, а и преку недела прават скара со многу месо, најчесто говедско.

Сакаат да одат во луксузни ресторани на вечера и затоа има голем избор на ресторани со различни интернационални кујни.

Какви се Јужноафриканците како пријатели, а какви се на работното поле?

Јужна Африка е мултикултурна држава со микс од многу раси и националности, но, главно, тие се друштвени и добри луѓе со отворени видици, но, на работно место се по малку мрзеливи и неамбициозни.

Продолжува на следната страна...