Димитар Амски за животот во Мексико: „Сите се лежерни и без стрес, а во Тулум се најдобрите забави“

Детали

четврток, 27 јануари 2022

Димитар Амски од Скопје себеси се доживува како личност која не сака да биде дел од системот. Стремежот кон спојот на работа, забава и патување го натерало да размислување надвор од кутијата и го споило со прекрасни луѓе со кои заеднички создава, а истовремено му го овозможил и овој номадски начин на живот.

Димитар смета дека луѓето се создадени да уживаат, а не да бидат робови на времето и на работата. Иако голем дел има отстрането од себе, тој сè уште исфрлува мисли, практики и работи кои немаат никаков удел во неговиот живот и непотребно му создаваат тешкотии во леснотијата на постоењето.

Тој секојдневно чита книги, спортува, се дружи и во моментот се наоѓа во Мексико во потрага по нови искуства и лични издигнувања.

Додека во Македонија температурите се под нулата, ти уживаш на брегот на Карипското Море. Како заврши во Мексико?

Овој проект го почнавме минатата година сосем случајно. Миконос ни даде шанса и нè научи како да создаваме, но тоа беше само во лето од мај до септември, и сфативме дека имаме премногу слободно време во текот на годината и би било прекрасно да почнеме да градиме уште еден убав проект на некое преубаво егзотично место.

Тулум е место каде голем број од нашите клиенти од Миконос доаѓаат да одморат и да се препуштат на целосно уживање во остатокот од годината. Ние сме тука да им ја олесниме и оствариме нивната замисла за перфектен одмор.

Чиста среќа што тој луксуз има цена која ја овозможува нашата независност.

Кога си далеку од дома сè е поразлично. Димитар, кажи ми како ти е организирано секојдневјето во Тулум?

Уф, тешко прашање.

Мојот утрински филтер е дефинитивно јогата. После добар сон, бидувањето нежен спрема себе и целосното препуштање во движењето на телото низ природните елементи ми овозможува да се спојам со мојот дух, да ја зголемам својата вибрација и да ги исфилтрира сите настани од претходниот ден.

После мојот појадок, спремен сум да ги исполнам дневните онлајн активности, и штом завршам, доколку немам потреба да сретнам некои од моите клиенти одам на некоја од прекрасните плажи во моја близина.

Иако работата не принудува да излегуваме со нашите клиенти по луксузни места и да се забавуваме до раните утрински часови, јас преферирам вечерата да ја поминам со моите пријатели и соработници во нашиот скромен дом во џунглата. Споделуваме нови информации во врска со работата, уживаме во звуците на природата и се спремаме за излегување во некои од клубовите.

Тулум на сите ни е познат како комбинација од многу егзотика, плажи како од разгледници и место со најдобрите забави и фестивали, но како ти го доживуваш Тулум?

Буквално така, ама во живо!

Ако ти дојдат пријатели од Скопје и треба да им организираш еднодневна тура низ Тулум и околината, како би изгледала таа?

Уф, има толку многу да се види што за еден ден тешко дека би успеале. Зависи што моите пријатели би сакале да видат.

Освен многуте забави на кои присуствуваше, се дружеше ли со подводниот свет на Карипското Море?

Секако дека да, има толку многу плажи полни со жив свет кои секако имаат водичи кои те носат баш на тие места каде што можеш да го видиш цел подводен свет.

На самото доаѓање тука веднаш бевме на една прекрасна плажа Акумал каде што имавме организирано нуркање и пливање со желки.

На што туристите најмногу трошат пари во Тулум?

Туристите со кои ние работиме трошат најмногу на луксуз, прекрасни вили, маси во луксузни ресторани, маси во клубови.

Која е најубавата плажа во Тулум?

Тулум има едно долго крајбрежје кое е поделено на хотелска зона и археолошка зона, во хотелската зона има повеќе луксузни ресторани, хотели и клубови и нормално лежалки кои се наплаќаат, додека во археолошката зона има фини ресторани и е free beach.

Омилената моја плажа е во археолошката зона и се вика Ikal, има утрински и пладневни јога вежби, темезкал церемонии, extatic dance, organic dj sets, свежо вегетеаријанско и пескетаријанско мени во барот итн.

Какви се мештаните? Сподели некоја интересна случка од таму…

Првпат кога слетав во Мексико сфатив што значи споро. Како времето тука да оди поразлично. Сите се успорени, без стрес, уживаат во моментот, не брзаат никаде, немаат многу пари, а не им е ниту грижа.

Едноставно мораш да се успориш и да уживаш во моментот и ти. Мислам дека нема подобро место за да направиш ретроспектива и да сфатиш дека не вреди за ништо да се стресуваш и да чуваш лутина. Нема минато, нема иднина, само сега.

Што е она што секој мора да го искуси во Тулум, а и генерално во Мексико?

Сè е различно и прекрасно, од кокосот со лимон и зачини до прекрасните пештери со природни базени, идеалната клима, бавниот безгрижен живот.

Научи ли да го читаш мајанскиот календар и да ги применуваш нивните обичаи?:)

Научив само кој е мојот мајански месец на раѓање. Нивните ритуали имаат посебно место во мојот свет.

Секакви приказни кружат за Маите, која од нив најмногу ти ја разбуди имагинацијата?

Нивната спиритуалност, чиста душа, поврзаност со природата, ѕвездите и астрологијата.

Мексико е многу повеќе од …?

Мексико е мноооогу повеќе.

Во Тулум ќе бидеш до 30 јануари, што следува после тоа?

Одам на мала пауза и собир со мои драги пријатели на 2 седмици во Доминиканската Република. Да спознаам уште некоја земја додека сум во Латинска Америка.

Потоа, сме дел од еден прекрасен проект фестивал во Транкозо, Бахиа, Бразил кој ќе започне на 25 февруари и ќе трае 10 дена каде ќе бидат најпознатите имиња од клупската сцена.

Во лето се знае, Миконос е мојот втор дом.

© CRNOBELO.com Забрането преземање и копирање. Крадењето на авторски текстови е казниво со закон.

Е. Х | Црнобело