Крушево низ објективот на Ана Петроска: „Зошто топло ви го препорачувам овој град за викенд посета?“

Детали

среда, 21 септември 2022

„По утринското кафе со неверојатен поглед, ви препорачувам прошетка, која започнува од центарот на градот, продолжува до скијачкиот центар и може да финишира на Крушевско Езеро и на Гумење. И, се разбира, некој од превкусните крушевски специјалитети...“, раскажува Ана Петроска (24) од Скопје за нејзиното омилено Крушево.

Ана Петроска (24) од Скопје e вљубеничка во фотографијата, која вели дека најголема инспирација за фотографирање ѝ е убавината на градовите низ Македонија, а особено на нејзиното омилено Крушево, кое го посетува во секој слободен миг.

Таа за CRNOBELO.com открива дека развила голема љубов кон фотографијата, а своето знаење се труди да го подобри секој ден. Нејзина официјална страница на социјалните мрежи на која ги споделува фотографиите е Ana’s photos – justaphoto.аp.

Ана за CRNOBELO.com ни го доловува Крушево низ нејзините искуства и фотографии:

„Градовите низ Македонија се неизмерна инспирација за фотографија за мене. Најголемиот дел од моите фотографии се од Крушево каде што поминувам многу време, а самиот град нуди одлични можности за фотографија во текот на целата година.

Ова лето Крушево беше одлично место за одмор, прошетка, запознавање со историјата, традицијата и културата, вкусување на крушевската кујна и многу други искуства кои ги претставувам преку моите фотографии.

Еден викенд во Крушево може да биде лесно пополнет со активности и истиот додека трепнете ќе помине.

Препорачувам денот да започне со утринско кафе. Ако имате добар поглед од тераса кафето може да биде домашно, но секогаш имајте на ум да испиете кафе во локалните места каде што покрај убавиот вкус ќе добиете поглед, природа, свежина.

По освежувањето и расонувањето прошетка е нешто што треба да следи. Природата околу Крушево е исполнета со патеки кои ќе ви овозможат дружба со крушевската корија, чистиот воздух и мирот.

Омилена ми е прошетката кон ски центарот, место кое во лето станува сè попопуларно заради авантуристичкиот парк.

Прошетката која започнува од центарот на градот, продолжува до скијачкиот центар и може да финишира на Крушевско Езеро и на Гумење.

Езерото е едно од најпосетените места во Крушево. Препознатливо е кај најголемиот дел од гостите кои доааѓат тука.

Продолжува на следната страна...