Вера Калин: „Куба е неверојатно доживување - кабриолети, коктели за 100 денари, но немаштијата ѕирка од домовите“

Какви се цените за туристи?

Евтино е, но и не е.

Прво, во секој државен хотел, ресторан е многу евтино. Очекувајте да платите 100-тина денари за коктел.

Но по државните ресторани, немаат многу зачини и избор на храна, и иако евтина, веројатно ќе бирате да јадете во некои од неколкуте приватни ресторани. Цените во нив се горе долу колку Скопје.

За сè друго ќе треба да се ценкате. Првото возење со такси нè чинеше околу 20-тина евра, за истата далечина кога научивме како функционираат нештата плаќавме околу 7-8 евра.

Но она што го мислев со „евтино е но и не е" , најмногу се врзува со тоа што се опуштате, бидејќи во моментот сè ви изгледа евтино. Нема да испиете два, три коктели како што би испиле некаде во Европа, ќе испиете 10.

Давате бакшиш секаде, не само каде што седнувате, туку и на улични музичари, перформери, возачот во автобус, и слично.

Секако дека може да ограничите колку трошите. Може да поминете со 200-400 евра од човек за 7-8 дена, без факултативните излети. Било што над тоа би било тотално расфрлање.

Според тебе кои ти беа најдобрите плажи што ги посети за време на патувањето?

Посетивме само 2, Playa del Este и Варадеро, двете беа супер, но јас не отидов во Куба првенствено за плажа секако.

 

Успеа ли барем на кратко да продреш во животот и навиките на локалците?

Успеав нешто да дознам и видам, колку што можев, но толку е сè различно што би ми требало мноооогу подолго време за да навистина ги разберам нивните навики и начин на живот.

Најде ли автентични кубански пури?

Донесовме три вида пури, едни од Вињалес, направени од самото семејство кое ми покажуваше како се прават пурите, едни кои државата им ги дава на Кубанците (можат да ги земат со нивните тефтерчиња/бонови) и ширум познатите coiba.

Според мене најавтентични се оние кои ги пуши просечен Кубанец.

Со какви сувенири се врати во Македонија од Куба?

Секакви „тракатанци", ова е место од каде донесов најмногу сувенири. За дома си купив пури, кубанско кафе, статуетка од дрво и ударалки од некое сушено, преработено овошје.

Како за крај, што ги би советувала луѓето што сакаат да ја посетата Куба?

Да бидат отворени и да не тргнуваат со никакви очекувања. Плажите се убави, но Куба е многу повеќе од плажа - дозволете ѝ сама да ви ги открие сите нејзини слоеви.

© CRNOBELO.com Забрането преземање и копирање. Крадењето на авторски текстови е казниво со закон. Автор:

Е. Х. | Црнобело