Вера Калин: „Куба е неверојатно доживување - кабриолети, коктели за 100 денари, но немаштијата ѕирка од домовите“

Детали

недела, 04 декември 2022

„Мислев дека претходно сум доживеала културен шок - но ова беше друго ниво. Не знаев што да очекувам, и мислам дека очекував сè освен она што го доживеав. Помина извесен период откако се вратив, а јас сè уште не можам да ги преточам нашите доживувања во зборови“, споделува Вера Калин од Скопје за CRNOBELO.com за нејзиното патување во Куба.

Вера Калин (28) од Скопје е писател и автор на романот „Бездомникот со златен часовник“, а работи и во маркетинг сектор.

Неодамна Вера беше на патување во Куба.

Таа за CRNOBELO.com ги споделува нејзините впечатоци:

Колку долго сакаше да ја посетиш Куба?

Искрено, не би можела да одредам конкретна точка кога посакав да ја видам, јас сакам да го видам светот, Куба отсекогаш била на мојата листа на места каде сакам некогаш да отидам.

 

Што најмногу те привлече за да заминеш на ова патување?

Сакав да одам на егзотична дестинација каде можам да доживеам нешто повеќе од само убави плажи, некако природно изборот падна на Куба.

 

Со што прво се соочи откако слета на аеродромот во Хавана?

Леплив, влажен воздух, палми, и возила од 60-тите. Си реков: па и не изгледа дека се толку сиромашни (претходно имавме направено некакви истражувања).

Аеродромот и првите впечатоци никако не ме подготвија за седмицата која следуваше.

 

Со какви очекувања тргна на патувањето, а што всушност те пречека во Куба?

Мислев дека претходно сум доживеала културен шок - но ова беше друго ниво. Не знаев што да очекувам, и мислам дека очекував сè освен она што го доживеав.

Помина извесен период откако се вратив, а јас сè уште не можам да ги преточам нашите доживувања во зборови.

Од начинот на којшто функционираат нештата (сè се одвива на улица, на црниот пазар), до минималните примања на луѓето (20тина, 30 евра месечна плата), до безбедноста која не сум ја почувствувала на ниедно друго место како турист досега (и покрај немаштијата која владее), до неверојатните предели и доживувања кои се во целосна спротивност на секојдневниот начин на живот, секој ден, секое ново место, не престануваше да ме изненадува.

 

Како изгледаше маршрутата на патувањето?

Бевме сместени во стара Хавана, во casa particularеs. Тоа се приватни сместувачки капацитети во срцето на Хавана. Меѓу хотел и автентично сместување, секогаш сум за автентично сместување така што тоа ни беше ептен погодено. Не сум all inclusive тип на човек (но дефинитивно ако некој е повеќе за ресорти, има и таква опција на Куба).

Првиот ден го поминавме низ стара Хавана. Морам да кажам дека првиот ден бевме многу изненадени, несигурни за тоа што следува, и дури и во еден момент се запрашав дали ќе ми се допадне. Иако на сликите не изгледа така, стара Хавана е навистина… стара.

Бидејќи луѓето се сите постојано на улица, со отворени врати,  можеш да им ѕирнеш дома. Она што го видовме беше одраз на целосна немаштија.

Веќе од следниот ден се навикнуваш на глетката и почнуваш да ги впиваш сите искуства.

Бевме во куќата на Хемингвеј, пиевме сок од шеќерна трска и јадевме риба на плажата на 18-тина километри од Хавана

Во Вињалес, гледавме како се прават кубански пури, се возевме со бротче од едниот до другиот крај на една пештера, на пат за назад ги видовме најслабите кучиња и коњи кои некогаш сум ги видела, пиевме пиво од 50 пезоси (20 денари), среде никаде, до муралот на праисторијата.

Бевме на плажа во Варадеро.

Бевме во кабаре во познатиот хотел „Национал“.

Бевме на настап во Buena Vista Social Club.

Бевме во клуб/галерија (Fabrica Del Arte) и видовме спој на уметност и музика какви не сме виделе дотогаш.

Непрестано се чудевме како е сè државно.

Пиевме daiquiry во floridita, до статуата на Хемингвеј.

Бевме во спомен куќата на Кастро.

Се ценкавме на секој чекор, најмногу за такси.

Можеш ли да со локалците без да го познаваш шпанскиот јазик?

Би рекла дека можеш, „Where are you from" е главно прашање на секој чекор на улица пред да пробаат да ти понудат такси, пури, рум, и што ли уште не. Но ние кои сме растени во време на шпански серии - веќе по вториот ден почнавме да си копаме по сеќавањата и да се разбираме на (скршен) шпански.

 

Кои знаменитости ти оставија најмногу впечаток?

Апсолутно сè. Не постои нешто што видов за кое сметам дека не беше добро поминато време.

 

Имаше ли можност да присуствуваш на добра кубанска салса забава?

Излегувавме доста, од кабареа до клубови, Куба има што да понуди.

Продолжува на следната страна...