„Ја посетив Кина, летав од Скопје до Виена и од таму до Пекинг – каков впечаток ми остави оваа земја?“

Гуижоу

После тоа, со авион од Пекинг, заминавме во провинцијата Гуижоу и главниот град Гујанг.

Гуижоу е провинција без излез на море во југозападниот регион на Народна Република Кина. Нејзин главен град и најголем град е Гујанг, во центарот на провинцијата.

Ја посетивме оваа провинција на крајот од патувањето; односно последната седмица. И ова беше мојот омилен дел. Природа, чист воздух, здрава храна и многу весели луѓе.

Многу ретко се задржувавме во градот. Само еден ден беше посветен да го посетиме Националниот парк Кјанлинг (што впрочем е и планина). Во планината Кјанлинг живеат многу диви мајмуни и може да се каже дека тие се вистинските сопственици на планината.

Мајмуните се од видот макаки, кои се заштитени од Државниот степен II и се еден од најчестите типови мајмуни во природата. Мајмуните се многу палави и може да украдат храна и пијалоци од рацете на туристите, па затоа најдобро е целата храна да ја ставите во вашата торба.

И ние имавме мала незгода, кога еден од мајмуните изгреба еден член од нашата група, која мораше итно да замине да прими вакцина.

Последните денови ги поминавме во посета на разните водопади во оваа Провинција (Хуангошу, Дупотанг, и многу други).

Здивот ти се одзема од природата. Како да беше отсечок од некој кинески фантастичен филм со боречки вештини; како разгледница; како слика на платно. Не беше реално. Дури и денес кога си ги гледам фотографиите не ми изгледаат реално.

Во оваа провинција патувавме со автобус. Така најубаво може да се доживее Кина. Посебно место во моето срце доби областа Ванфенглин, со нејзините прекрасни ридчиња и мали селца.

Во текот на патувањето, некако потсвесно се надевав да не налетаме на следното нешто. Но ете, како да сакало да нѐ поздрави на крај, вакумирано, во продавница на бензинска пумпа. Кучешко месо.

Тоа беа три седмици исполнети со културен шок (скоро секој ден), разновидна храна која за нас не е сфатлива, преубава природа (величествени водопади, зелени ридови, прекрасни долини), стари градби, и многу интересен народ.

Имав многу голема среќа да појдам на вакво патување во Кина. И се надевам дека секој еден од вас ќе има шанса да појде на овој далечен Исток.

Топло ја препорачувам Кина секому, а посебно јужниот дел односно провинцијата Гуижоу. Тоа е такво катче на оваа планета, што мора да се посети. Настрана сите работи кои не ни се познати нас, доволно е да се посети за природата. Тоа е доволно да ве промени. Како што ме промени и мене.

По патот накај дома, не можев а да не помислам на сите убавини на оваа планета. Колку има да се посети. Колку има само да се види. А животот прекраток. Но мора. Мора. 

©CRNOBELO.com Забрането преземање и копирање. Крадењето на авторски текстови е казниво со закон.

Кирил Ангелов | Црнобело