Никола Атанасов: „Јас сум фриленсер, со другари се преселив на Бали, работам од плажа на зајдисонце“

Долови ни ја атмосферата за живот од таму... Какви се локалците, сиромаштија ли е, како се забавуваат?

Локалците пред сè, за разлика од Европејците, се многу фини, топли и културни. Отворени кон нови култури и религии.

Сиромаштија има, иако на Бали би рекол многу помалку од другите делови на Индонезија поради големиот број на туристи од странство, но и фриленсери кои имаат значителен удел во економијата.

Забавите се доста европски, има одлична диџеј сцена, многу познати, но и андерграунд имиња од најпознатите светски сцени како Холандија, Германија, Англија итн.

Локалците ни кажуваа дека азискиот ноќен живот е доста поинаков од тоа на што ние сме навикнати, но сè уште не сме го истражиле.

Каков е стандардот на живот? Кажи ни некоја цена оттаму...

Стандардот и цените се во просек многу слични како кај нас во Скопје. Уличните ресторани се доста поевтини и може да се најде оброк за помалку од 1 долар, додека поексклузивните ресторани имаат 2 до 3 пати повисоки цени отколку рестораните кај нас.

За алкохол има додатен данок затоа што е муслиманска држава, па цената се движи од 2 до 5 долари во просек за пијалак. Кафе чини од 1 до 3 долари.

Имаше ли некој непријатен миг таму?

Засега немавме таков момент, освен шокираност од непријатните големини на тропските животни.

Кое ти е омиленото место таму?

Улувату и Нуса Пенида ми се омилените места, со најубавите тиркизни плажи, но во исто време се доста опасни затоа што има често големи бранови и карпи.

Какви се локалците кога станува збор за пријателствата? Си одите ли со пријатели оттаму по гости дома?

Локалците се пријатен и многу топол народ, немаат проблем да поканат странец во нивниот дом.

Имајќи предвид дека повеќето индонезиски семејства се многудетни, па фамилијарните дружби (прослави, родендени) изгледаат многу поразлично отколку кај нас. 

Пред да одиме на Бали што треба да знаеме?

ВИЗА! Мора да се извади онлајн пред тргнување, но не може во конзулат или амбасада, мора таа процедура да оди преку локална агенција.

Имаше случаи каде што Македонци добиле погрешна информација дека може да извадат виза на аеродром при пристигнување и беа вратени.

Многу битно е туристите тука да не ни помислат на дрога, затоа што често се случува локалните власти и да егзекутираат некого ако е фатен и со најминимална количина.

Би се вратил ли да живееш во Македонија некогаш?

Да, не ми е првпат да живеам во странство. Студирав во Италија и потоа се вратив дома, веројатно тоа ќе се случи и овој пат.

Повеќе фотографии на следната страна...