Љубовната приказна на Драгица од Скопје и Марк од Бејрут: „Ме запроси во Либан, а се венчавме во Македонија“

На 22-ри јуни имавме свадба во Скопје, во Ресторан Едера Руфтоп, каде што присуствуваа најблиските на Марк, а на 2-ри јули ќе правиме свадба и во Бејрут каде што ќе дојде моето семејство и најблиски другарки.

Свадбата во Скопје беше нешто што ги воодушеви сите гости, особено гостите од Либан, бидејќи се потрудив да им го доловам традиционалното, македонското, и истото да го спојам со интернационално.

Марк веќе бил на македонски свадби и точно знаеше што сака да вклучиме во нашата свадба.

Од традиционалното најмногу им се допаднаа обичаите кога доаѓаат по невеста со музика, кршење на погача и буткање на врата. Дури и се трудеа да научат како да ги играат нашите ора.

Имавме и либански ора наречени „дабке“ каде што гостите од Либија ни покажаа како ги играат своите ора и македонските гости се потрудија да ги играат.

Воедно, на свадбата свиреа и виолини за време на приемот и на матичното, потоа истиот бенд кој дојде по невеста беше задолжен за веселата атмосфера и на крај завршивме со ДЈ. Имавме гости од многу различни држави и сите беа восхитени од нашата музика, нашата весела природа и гостопримството.

Марк веќе бил во Македонија повеќепати и на сите им кажува дека е Македонија место кое треба да се посети, па дури и направи план каде да ги шетаме гостите после свадбата.

Така, дента после свадбата се упативме кон Охрид и сите беа воодушевени од убавините и историјата. Македонската храна им стана омилена, обожаваат гравче тавче, пинџур и ајвар, дури бараа и рецепти за да можат да си зготват сами.

Пред заминувањето за Бејрут, купија многу македонски производи кои ќе ги подарат на своите пријатели бидејќи е нешто потполно различно од тоа што го јаделе и виделе досега. Сите ветија дека ќе се вратат во Македонија многу скоро.

Мора да кажам некој збор и за Либан, јас таму сум била повеќепати и секојпат ме изненадува повторно и повторно.

Либан е помала држава, но со поголема населеност од Македонија. Таму луѓето се грижат за својот изглед, и следат бонтон и во најобични секојдневни ситуации.

Луѓето се многу дружељубиви и позитивни и секогаш се спремни да помогнат. Неговото семејство ме прифати како нивна ќерка и јас сум многу среќна за тоа.

Ние меѓу себе разговараме на англиски јазик, но Марк почна да учи македонски и одлично му оди. Арапскиот јазик е многу тежок, па мене ми оди малку потешко.

Ние имаме многу заеднички особини, двајцата обожаваме да патуваме, па така веќе сме посетиле заедно многу држави, но некои од омилените патувања ни се Маурициус, Кипар, Италија. Воедно, планираме да патуваме за Јапонија и Америка.

Исто така, двајцата сме многу приврзани за нашите семејства, па една од нашите желби е да имаме големо семејство.

Продолжува на следната страница...