Д-р Звезда Спасовска, специјалист педијатар советува: Кои лекови треба да ги понесеме на одмор со деца?

Детали

понеделник, 10 јули 2023

„Родителите треба да понесат препарати за кои сами можат да проценат дали треба да ги вклучат во лекувањето, на пример сируп и чепчиња за температура, електролити, пробиотик, капки за носето, крем за смирување на иритациите...“ вели специјалист педијатар Звезда Спасовска за CRNOBELO.com.

Доктор Звезда Спасовска, која важи за еден од најдобрите педијатри кај нас, често се соочува со прашањето кои лекови треба да ги понесат родителите кога одат на одмор со деца.

За CRNOBELO.com, Д-р. Спасовска вели дека иако кај родителите постои страв за здравјето на детето, тие треба да се одлучат за препарати за кои сами можат да проценат дали ќе му ги дадат на детето или не.

„Сега е сезоната на летните одмори и сите родители се во страв да не се случи нешто додека се на одмор. Тие често земаат лекови и антибиотици со себе за кои, искрено, не можат да проценат дали треба да ги употребат.

Затоа треба да понесат препарати за кои сами можат да проценат дали треба да ги вклучат во лекувањето, како на пример сируп и чепчиња за температура, електролити, пробиотик, капки за носето, крем за смирување на иритациите, газички, фластерчиња и јоден раствор за тоалета на мала рана, препарат против убоди од инсекти и, секако, фактор за сончање.

А доколку состојбата на детето се влошува или трае подолго од три дена, тогаш треба да посетат доктор кој ќе им даде дополнителна терапија доколку има потреба од тоа,“ вели таа.

А. Ј. | Црнобело