Николина е акушерка во Германија: „Има жени што каснуваат од плацентата, родилките не треба да внимаваат колку се гласни при породувањето“

Детали

вторник, 08 август 2023

Инстаграм профилот на Николина Ралевски „Моја Акушерка“ e вистинска ризница со совети за сите бремени жени и мајки на новороденчиња. Таа редовно го споделува своето искуство и знаење што го стекнала како акушерка која неколку години наназад работи во родилна сала, а на тој начин и на македонските мајки им ги пренесува трендовите што се карактеристични за една развиена европска земја како Германија.

Николина е родена во Битола, а живее во Штутгарт, Германија. Таа е мајка на две прекрасни дечиња, Лука и Лара, а веќе 10 години работи како акушерка во родилна сала.

Прво работела во мала болница каде се раѓале деца од 37-ма гестациска недела, па натаму, а во 2016-та година се вработила во болница каде породувањата се од 24-тата гестациска недела, со интензивна бебешка нега (за ранородените бебиња), клиника која е со преку 2.700 породувања годишно.

Таа појаснува дека идејата за да започне свој Инстаграм профил посветен на совети за мајки и бремени жени дошлa сосема спонтано.

„Во 2021 година останав бремена со моето второ дете, Лара и поради КОВИД пандемијата, и заради мојата бременост не работев во родилна сала.

Во исто време неколку мои другарки од Македонија беа бремени.

Така почнавме да разговараме на теми поврзани со бременоста, пораѓајот и заклучив дека Македонија нема доволна медицинска и емоционална поддршка за периодот кога жената е бремена.

Вака се раѓа желбата, целото мое искуство да го пренесам на мајките на кои им е потребна мојата помош, притоа, тие да не бидат советувани од кругот на семејството и пријателите.

Морам да напоменам дека од пред три месеци го започнав мојот онлајн курс, поготовка за пораѓај и постпартум период, кој се наоѓа на платформата mojaakusherka.mk, кој е единствен во Македонија од стручно медицинско лице.

Со Николина разговаравме на повеќе теми, поврзани со самиот процес на породување кај нас и во Германија, но и за тоа на што треба да внимаваме во грижата за новороденчиња во текот на летните денови.

Следува целото интервју со Николина:

Кои се најчестите проблеми со кои бремените жени се соочуваат во текот на летниот период?

Летните, жешки денови, како за сите, така и за трудниците имаат негативно влијание врз телесната хидратација, чести појави на отоци на екстремитетите, влијание на крвниот притисок и сл.

Затоа треба трудниците да бидат внимателни, да избегнуваат директна изложеност на сонце, добро хидрирање, користење на креми за заштита од сонце (природноминерални) и слично.

За сите ваши грижи и симптоми обратете се кај вашиот матичен гинеколог.

Кои се најчестите заблуди што жените ги имаат за самиот процес на породување?

Нестручните совети и приказни од другарка, сосетка, братучетка... Можат да доведат до несигурност, стравови, заблуди итн.

Што се случува вообичаено со остатоците од постелката од утробата на мајката што се вадат по породувањето?

Германија е држава во која живеат многу народи и испреплетени се многу култури при што сме биле сведоци на различни традиции.

Едни од најпознатите се: правење на хомеопатски лекови од плацентата, засадување на плацентата во земја и потоа садење дрво на истото место, симболирајќи го почетокот на новиот живот.

Поретко се среќава пациентка која сака да касне парче од плацентата или да направи смути. Во најголем дел, болницата се погрижува за остатоците од плацентата.

Кои се најдобрите вежби, според вас што на бремените жени може да им помогнат при самото породување?

Самото породување е процес во кој треба да бидеме и физички и психички активни.

Промената на позициите и движењето за време на пораѓајот нуди многу придобивки.

Колку што сум информирана, во Македонија, овие техники кои помагаат во породувањето, за жал, ретко се користат.

Во Европа и светот, на родилката ѝ се дава можност да избере начин кој најмногу би ѝ помогнал.

Со користењето на овие техники се намалува болката, се зголемува чувството за контрола и соработка на мајката во самиот пораѓај, се подобрува удобноста, се променува обликот на карлицата со што главата на бебето се доведува во оптималната положба итн.

Во мојот курс има видеа за позиции кои можат да се користат за олеснување на пораѓајот.

Продолжува на следната страница...