Д-р Наум Трпеноски, офталмолог: „Со операција на катаракта се отстранува и диоптријата за близина, зафатот трае 20-тина минути“

Според вас кои леќи се најдобри за отстранување на оваа диоптрија на близина?

Според мене, најдобри се монофокалните леќи со продолжен фокус и трифокалните леќи. Акцентот го ставаме на нив во нашата болница Промедика Офталмологија бидејќи и едните и другите остваруваат извонреден резултат во видот на далечина и близина на 30 и 70 cm.

Овие леќи заземаат голем замав на пазарот бидејќи во овие модерни времиња на лап-топ и мобилни телефони едноставно сме зависни од видот на близина.

Колку време трае зафатот, но и закрепнувањето од операција на катаракта?

Оперативниот зафат трае околу 20-тина минути, додека постоперативното закрепнување е индивидуално зависност од степенот на зрелост на катарактата.

Вообичаено, пациентите кои навремено се јавуваат за оперативен зафат, подобрувањето на видот го забележуваат уште следниот ден, додека оние кај кои катарактата е присутна подолг временски период и народно кажано чекаат пердето да „созрее“, имаат подолг временски период на закрепнување и разбистрување на видот.

Сте правеле ли некогаш корекција на таков тип на операција на пациенти кои претходно имале неуспешна операција на друго место? Постои ли решение?

Да, решение секогаш постои. Сме правеле многу корекции кај веќе оперирани пациенти кај кои постоперативно била заостаната поголема диоптрија.

Има ли пациенти на кои не може да се изврши операција на катаракта од некои причини и кои се тие?

Нема, катаракта е замаглување на природната човечка леќа и истата може и мора да се отстрани.

Кој е најнов тренд и можност во хирургијата на катаракта?

Тоа секако во овој момент е 3D хирургијата на катаракта, при што оперативниот зафат се одвива со помош на посебна опрема за таа 3D хирургија.

Многу е покомфорно за хирургот, бидејќи окото во 3D слика го гледа во своите природни димензии и истото нуди значително зголемена сигурност, а со тоа и големо задоволство од успехот на операцијата.

Д-р сци. Наум Трпеноски специјализира офталмологија на клиниките за очни болести во Скопје и Белград и е пионер на операцијата за катаракта со ултразвук во државното здравство.

Ја прави првата операција со ултразвук во државното здравство во Македонија 2010 година, во Градската општа болница 8 Септември, Скопје, каде работел 12 години. 

Потоа ги прави првите операции на катаракта со ултразвук во Битола, Куманово и Струмица.

Извршува операции и во болниците во Прилеп и Штип. Магистер е по здравствен менаџмент и доктор на науки од област на медицина - биомедицина.

Моментално е медицински директор и хирург во Специјализирана очна болница Промедика Офталмологија.

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело