Бобан Пешов речиси 30 години живее во Италија: „Тука сум пораснат, во Македонија повеќе се чувствувам како странец“

Детали: понеделник, 06 мај 2024

Бобан Пешов (36), по потекло од село Трсино, Виница, се преселил во Италија со своето семејство кога имал само 7 години. Живее во близина на Алба со сопругата Марјана, ќерката Грета (6) и синчето Енеа (1).

Иако по професија е дипломиран архитект, работи како карикатурист и илустратор.

„Во Италија сум од 1996, живееме во близина на Алба. Имав неполни 8 години кога се преселивме заедно со моите родители и брат ми. По професија сум дипломиран архитект. Во Италија почнав во училиште од второ одделение, значи израснав овде и се приспособив одлично во средината.

Мојата сопруга се пресели во Италија за да студира овде. Напорни беа првите неколку месеци додека да го научи јазикот, но потоа адаптирањето одеше лесно. Заедно сме речиси 15 години“.

Во интервју за CRNOBELO.com тој открива повеќе детали за животот и работата во Италија...

Работите како илустратор на стрипови - колку се цени оваа работа таму?

Илустрирам стрипови, во овој момент работам на проект (графички новели со мои содржини и илустрации) со голема издавачка куќа, Tunué од Рим.

Овде продажбата на стрипови е голема, љубовта кон стриповите е посебна.

Во Италија има голем број саеми од оваа област, а еден од најголемите на светско ниво е Lucca Comics.

Овој саем е најзначаен за мојата професија и голема шанса за сите почетници да се претстават пред голема публика и да стапат во контакт со најголемите издавачки куќи.

Постојат ли стереотипи за Македонците во Италија? Дали некој сè уште ве смета за странец?

Можам да кажам дека јас повеќе се чувствувам како странец во Македонија, сепак тука сум пораснат. Најголем дел од стереотипите се поврзани со Југославија.

Во околината каде што живеам има многу Македонци. Сите сметаат дека сме вредни и чесни работници.

За позитивните и негативните страни на Италија, Бобан вели:

„Италија е држава со голема историја на архитектура и уметност. Секој регион има посебна убавина. Единствено нешто на што не можам да се навикнам се некои луѓе кои промовираат негативни фашистички идеи.

Здравствениот систем фукнционира одлично, хигиената во Северна Италија е на некое ниво, за разлика од Јужна Италија и периферијата на големите градови како Рим и Наполи.

Има голема бирократија и институциите честопати се бавни. Многу е лесно да стекнете пријателства овде, секогаш се расположени за дружење“.

Што ви е омилено од италијанската кујна? Дали би рекле дека готвите како Италијанец?

Обожавам да готвам италијански специјалитети, можам да се пофалам дека сум навистина добар во кујна. Наполитанската пица ми е омилена. Од време на време со сопругата знаеме да зготвиме и тавче гравче и зелник.

5 работи кои секој треба да ги има на ум пред да се пресели во Италија?

- Овде има навистина голема можност за вработување во различни сектори.

- Храната е прекрасна.

- Здравството е загарантирано за секого.

- Има голем број Македонци кои ќе ви помогнат лесно да се адаптирате во околината.

- Италија е голема држава која нуди прекрасни места за одмор, релаксирање, култура и уметност.

Колку често доаѓате во Македонија? Би се вратиле ли да живеете овде?

Во Македонија доаѓаме еднаш во годината, во летниот период. Немам некоја посебна носталгија бидејќи сум пораснат во Италија и сепак Македонија ми е втор дом.

Никогаш не се знае, но во моментов мојата иднина ја гледам во Италија.